साहेब, यंदा तरी लाभ मिळेल का? दत्तक योजनेतील खेळाडूंचा सवाल

- महापालिकेकडून ४४ लाभार्थी पात्र, पण दोन महिने उलटूनही मदतीचा निधी नाही; आचारसंहितेमुळे विलंब होण्याची भीती

- आकाश झगडे 

पिंपरी : महापालिकेच्या क्रीडा विभागाने ऑक्टोबर महिन्यात खेळाडू दत्तक योजनेच्या लाभार्थींची यादी जाहीर केली. मात्र, दोन महिने उलटले तरी, प्रत्यक्षात लाभ मिळालेला नाही. त्यात आचारसंहितेमुळे अजून विलंब होण्याची भीती आहे. त्यामुळे साहेब, यंदा तरी लाभ मिळेल का, असा सवाल दत्तक योजनेतील खेळाडू करत आहेत.

पिंपरी-चिंचवड शहरातील गुणवंत खेळाडूंना प्रोत्साहन देण्यासाठी १३ वर्षांपूर्वी सुरू झालेली खेळाडू दत्तक योजना गेल्या सात वर्षांपासून बंद होती. विशेष म्हणजे योजना बंद असूनही महापालिकेचा क्रीडा विभाग दरवर्षी खेळाडूंकडून अर्ज मागवत होता, मात्र त्यावर कोणतीही कारवाई होत नव्हती. खेळाडू दत्तक योजना शहराच्या क्रीडा विकासासाठी आवश्यक आहे. परंतु, प्रशासकीय दिरंगाई आणि विलंबामुळे खेळाडूंचे वर्ष वाया जाण्याची भीती व्यक्त होत आहे. लाभार्थी खेळाडूंची मागणी

निवडणुकीची आचारसंहिता लागू झाल्यास निधी वाटपाचे काम थांबते. त्यामुळे लाभ मिळण्यास अजून विलंब होईल. परिणामी खेळाडूंना अत्यावश्यक प्रशिक्षणासाठी किंवा स्पर्धेसाठी साहित्य खरेदी करण्यासाठी वाट पाहावी लागत आहे. आचारसंहिता लागण्यापूर्वी तातडीने निधी वितरित करावा, अशी मागणी आहे. सात वर्षांनी योजनेला मुहूर्त

योजनेसाठी महापालिकेने २०२४ मध्ये अर्ज मागवले होते. याला राष्ट्रीय आणि आंतरराष्ट्रीय स्तरावर खेळणाऱ्या ५८ खेळाडूंनी प्रतिसाद दिला. छाननीनंतर त्यापैकी ४४ खेळाडूंचे अर्ज पात्र ठरविण्यात आले आहेत. यामुळे तब्बल सात वर्षांनी योजनेला मुहूर्त लागला आहे. या योजनेतून निवड झालेल्या खेळाडूंना सराव, आवश्यक साहित्य आणि प्रशिक्षणासाठी महापालिकेकडून आर्थिक मदत मिळणार आहे.

२०२३-२४ चा लाभ कधी मिळणार?२०२२-२३ च्या लाभाची अशी अवस्था असतानाच महापालिकेने २०२३-२४ या वर्षासाठीही अर्ज मागविले आहेत. यासाठी ३८ जणांनी प्रतिसाद देत अर्ज दाखल केले आहेत. या वर्षाच्या अर्जांची कधी छाननी होणार आणि त्यांच्या खात्यावर लाभ कधी येणार, हा प्रश्न अनुत्तरित आहे.

काय आहे खेळाडू दत्तक योजना?

ही योजना महापालिका हद्दीतील किमान तीन वर्षे रहिवासी असलेल्या राज्य व राष्ट्रीय स्तरावरील खेळाडूंसाठी आहे. याअंतर्गत निवड झालेल्या खेळाडूंना पीएमपीएमएल बसमधून मोफत प्रवास, सकस आहारासाठी भत्ता, खेळाचे साहित्य आणि गणवेश, फिजिओथेरपी आणि क्रीडा वैद्यकीय सुविधा, स्पर्धेत प्रावीण्य मिळाल्यास स्वतंत्र शिष्यवृत्ती मिळते.

 ऑक्टोबरमध्ये यादी जाहीर झाली. अद्याप एक रुपयाही मिळाला नाही. आचारसंहिता लागल्यास निधी पुन्हा अडकेल आणि पुढील वर्षाच्या स्पर्धेची तयारी थांबेल. महापालिकेने फक्त कागदपत्रे पूर्ण केली, पण प्रत्यक्षात आम्हाला मदत कधी मिळणार? - पात्र खेळाडू

डिसेंबर महिन्यात सर्व पात्र लाभार्थींना निधी देण्यासाठी प्रशासन प्रयत्नशील आहेत. खेळाडूंना निधी वाटपात आचारसंहितेमुळे विलंब होणार नाही.- पंकज पाटील, उपायुक्त, क्रीडा विभाग.