न्यायालयाच्या निर्णयाने मार्ग रिकामा होताच उद्योगनगरीतील राजकीय तापमानामध्ये वाढ 

महापालिका निवडणुकीच्या तयारीला वेग; सर्व पक्षांसह इच्छुक उमेदवारांनी कंबर कसली; पक्ष कार्यालयांपासून प्रभागातील कार्यालयापर्यंत सर्वच स्तरांवर बैठकांची लगबग

पिंपरी : महापालिका निवडणुकांसाठी सर्वोच्च न्यायालयाने मार्ग रिकामा करताच निवडणूक कार्यक्रम कधीही जाहीर होण्याची शक्यता निर्माण झाली आहे. यामुळे शहरातील राजकीय हालचालींना अचानक वेग आला असून, पक्ष कार्यालयांपासून प्रभागातील कार्यालयांपर्यंत सर्वच स्तरांवर बैठकांची लगबग सुरू झाली आहे.

निवडणुकीची चाहूल लागताच संभाव्य उमेदवारांची चाचपणी सुरू झाली असून, प्रभागनिहाय गणिते, मतदारसंघनिहाय समीकरणे आणि पॅनलच्या आखणीसाठी धावपळ सुरू झाली आहे. गेली तीन वर्षे महापालिकेत प्रशासकराज होते. त्यामुळे महापालिका निवडणुका विशेष महत्त्वाच्या ठरणार आहेत. त्यासाठी सर्वच पक्ष जोमाने तयारी करत आहेत. आता न्यायालयाने निवडणुकांचा मार्ग रिकामा होताच शहरातील राजकीय वातावरण तापायला सुरुवात झाली आहे. आता निवडणूक कार्यक्रम कधी जाहीर होतो, याकडे सर्वांचे लक्ष लागले आहे. 

मतदार याद्या आणि मनुष्यबळाची चाचपणी

कार्यकर्त्यांनी घराघरांत संपर्क वाढवण्यास सुरुवात केली असून, सोशल मीडियावरही प्रचार सक्रिय झाल्याचे पाहायला मिळत आहे. काही प्रभागांमध्ये अंतर्गत गटबाजीचे संकेत, तर काही ठिकाणी नवे चेहरे पुढे येण्याची शक्यता वाढली आहे. प्रशासनाकडून निवडणूक यंत्रणा सज्ज करण्याचे काम सुरू आहे. प्रभागनिहाय मतदारयाद्या, मतदान केंद्रांची तयारी, मनुष्यबळाची चाचपणी आणि शिस्तबद्ध नियोजनाला गती देण्यात आली आहे. निवडणूक आयोगाकडून कार्यक्रम जाहीर होताच प्रक्रिया तातडीने सुरू होईल, अशी चिन्हे आहेत. 

आमची सर्वेक्षणापासून सगळी तयारी झाली आहे. उमेदवारांचीही चाचपणी सुरू आहे. महापालिका निवडणुका स्वबळावर लढण्याची तयारी आहे. स्वबळावर लढायचे की युतीत, हा निर्णय वरिष्ठ पातळीवरील होईल.  - शत्रुघ्न काटे, शहराध्यक्ष, भाजप 

पिंपरी-चिंचवड शहरात बहुतांश प्रभागात राष्ट्रवादीचे वर्चस्व आहे. त्यामुळे महायुतीत राष्ट्रवादीला समाधानकारक जागा मिळाल्या तर एकत्र लढू. दोन्ही राष्ट्रवादी एकत्र लढण्याबाबत वरिष्ठ पातळीवर निर्णय होईल. - योगेश बहल, शहराध्यक्ष, राष्ट्रवादी (अजित पवार गट)

भाजपला विरोधी पक्ष संपवायचा आहे, अशी स्थिती आहे. मात्र, काँग्रेस आणि आघाडीतील सर्व पक्ष ताकदीने उतरणार आहेत. त्याबाबत बैठकाही झाल्या आहेत. काँग्रेसच्या उमेदवारांच्या मुलाखती घेतल्या आहेत.  - कैलास कदम, शहराध्यक्ष, काँग्रेस 

आमच्या पक्षाचे सर्वेसर्वा शरद पवार यांच्या आदेशाने आम्ही मैदानात उतरण्याची तयारी केली आहे. दोन्ही राष्ट्रवादी एकत्र किंवा महाविकास आघाडीसोबत लढायचे हा निर्णय सर्वस्वी वरिष्ठांचा आहे.  - तुषार कामठे, शहराध्यक्ष, राष्ट्रवादी (शरद पवार गट) 

शिवसेना, मनसे आणि महाविकास आघाडीसोबत महापालिका निवडणुकीत सामोरे जाणार आहोत. तसेच जागावाटपाबाबतही बैठका सुरू आहेत. आमच्या पक्षाकडून तयारी सुरू केली आहे. - संजोग वाघेरे-पाटील, शहरप्रमुख, उद्धवसेना

शिवसेना महायुतीतच लढणार आहे. जागावाटपाबाबत खासदार श्रीरंग बारणे हेच निर्णय घेणार आहेत. तसेच उमेदवारांचीही तयारी पूर्ण झाली आहे. सर्व चर्चा अंतिम टप्प्यात आली आहे. - राजेश वाबळे, शहरप्रमुख, शिंदेसेना

शहरातील १२८ जागांवर ‘आप’चे उमेदवार निवडणूक लढवणार आहेत. त्यांतील १५ जागांवरील उमेदवार जाहीर केले आहेत. त्यांच्या प्रचाराला सुरुवातही झाली आहे. -  रविराज काळे, शहराध्यक्ष, आप 

आम्ही महायुतीचे महत्त्वाचे घटक आहोत. शहरातील पंधरा जागांवर उमेदवार उतरविण्याची तयारी आहे. १५ जागांवर सक्षम उमेदवार तयार आहेत. त्या जागांसाठीच पक्ष आग्रही आहे. - कुणाल वाव्हळकर, शहराध्यक्ष, रिपाइं (आठवले गट)