LPG Gas Crisis: पुणे जिल्हाधिकाऱ्यांच्या ९६ तासांच्या आदेशाला केराची टोपली; पिंपरीत जनता मात्र सिलिंडरसाठी गॅसवर

LPG Gas Crisis शहरात नागरिकांना चार दिवस तर सोडाच, दहा-पंधरा दिवस उलटूनही सिलिंडर मिळत नसल्याने तीव्र संताप व्यक्त होत आहे

पिंपरी : घरपोच गॅस सिलिंडर ९६ तासांत देण्याचा जिल्हाधिकाऱ्यांचा आदेश फक्त कागदावरच दिसून येत आहे. गॅस वितरकांकडून या आदेशाला अक्षरशः केराची टोपली दाखवल्याचे चित्र समोर आले आहे. शहरात नागरिकांना चार दिवस तर सोडाच, दहा-पंधरा दिवस उलटूनही सिलिंडर मिळत नसल्याने तीव्र संताप व्यक्त होत आहे. विस्कळीत वितरण व्यवस्थेमुळे सर्वसामान्यांचे जगणे अक्षरशः विस्कळीत झाले आहे. प्रशासनाने तातडीने हस्तक्षेप करून वितरण सुरळीत करावे आणि दोषी एजन्सींवर कठोर कारवाई करावी, अशी मागणी नागरिकांनी केली आहे. अन्यथा ९६ तासांत गॅस हा आदेश केवळ घोषणाबाजी ठरेल, असे म्हटले आहे.

आदेशाला केराची टोपली

जिल्हाधिकारी जितेंद्र डुडी यांनी १६ मार्च रोजी घेतलेल्या बैठकीत गॅस बुकिंगनंतर ९६ तासांत सिलिंडर घरपोच देणे बंधनकारक केले होते. थेट गोदामातून विक्रीवर बंदी घालत ओटीपीद्वारेच वितरण करण्याचे आदेश दिले होते. मात्र, आदेशानंतर आठवडा उलटूनही प्रत्यक्षात परिस्थितीत कोणताही सुधारणा झालेली दिसत नाही. शहरातील अनेक भागांत बुकिंगनंतर चार दिवस नव्हे, तर १० ते १५ दिवसांपर्यंत प्रतीक्षा करावी लागत असल्याच्या तक्रारी वाढल्या आहेत. दरम्यान, जिल्ह्यातील तब्बल ३८ लाखांहून अधिक गॅस ग्राहकांचा पुरवठा २२२ एजन्सींमार्फत केला जातो. मात्र, पिंपरी-चिंचवड पुरवठा विभागाकडेच शहरातील अधिकृत आणि अचूक आकडेवारी नसल्याचे समोर आल्याने प्रशासनाच्या नियोजनावर प्रश्नचिन्ह निर्माण झाले आहे.

पार्किंगमध्ये चूल पेटवण्याची वेळ

गॅस टंचाईमुळे घराघरांत स्वयंपाकाचा प्रश्न गंभीर बनला आहे. व्यावसायिक गॅस बंद असल्याने छोटे हॉटेल व्यवसायही कोलमडल्याने नागरिकांना महागड्या जेवणावर अवलंबून राहावे लागत आहे. परिणामी, दैनंदिन खर्चातही मोठी वाढ झाली आहे. काही नागरिकांना गॅस संपल्याने पार्किंगमध्ये चूल पेटवून स्वयंपाक करावा लागत असल्याचे दिसून आले.

उपासमारीची वेळ

गॅस सिलिंडर वेळेत न मिळाल्याने अनेक कुटुंबांवर उपासमारीची वेळ ओढवली आहे. घरगुती स्वयंपाक पूर्णपणे ठप्प झाल्याने नागरिकांना बाहेरून महागडे जेवण मागवावे लागत आहे. काही ठिकाणी हॉटेल्सही बंद असल्याने पर्याय आणखी कमी झाले आहेत. इलेक्ट्रिक शेगड्यांचा वापर वाढला असला, तरी त्याचा खर्च सर्वसामान्यांना परवडणारा नाही. परिणामी, दैनंदिन जीवनावर गंभीर परिणाम होत असून, नागरिकांचा संताप वाढत आहे.

एका आठवड्यापूर्वी सिलिंडर बुक केला, पण अजून मिळालेला नाही. गॅस संपल्याने पार्किंगमध्ये चूल पेटवून स्वयंपाक करावा लागत आहे. शेवटी इलेक्ट्रिक शेगडी घ्यावी लागली. - ॲड. बी. के. कांबळे, चिखली

१६ मार्चला बुकिंग केले. ९६ तासांत सिलिंडर देण्याचे आदेश होते; पण वितरक मनमानी करत आहेत. ग्राहकांची अक्षरशः कुचंबणा सुरू आहे. - प्रवीण कांबळे, गांधीनगर

गेल्या २० दिवसांपासून गॅस नाही. रोज हॉटेलवरून जेवण मागवावे लागते, तेही महाग झाले आहे. कुटुंबावर उपासमारीची वेळ आली आहे. - हिराचंद जाधव, पिंपरी

गेल्या २२ दिवसांपासून सिलिंडर बुक करण्याचा प्रयत्न करतोय; पण अडचणी येतात. घरात स्वयंपाकच ठप्प झाला आहे. - नितीन कोरबन, काळेवाडी