Lonavala Rain News : लोणावळ्यात चोवीस तासांत तब्बल २२१ मिलिमीटर पाऊस 

जनजीवन विस्कळीत : वाकसई चाळ, कार्ला, मळवलीत सोसायट्यांमध्ये पुराचे पाणी; मळवली-देवले रस्ता पाण्याखाली, सर्व नद्या धोक्याच्या पातळीवर

लोणावळा : पावसाचे माहेरघर म्हणून ओळखल्या जाणाऱ्या लोणावळा शहरात गुरुवारी दुपारपर्यंत २४ तासांत तब्बल २२१ मिलिमीटर म्हणजेच ८.७० इंच पाऊस झाला. या हंगामामध्ये एकूण ११६६ मिलिमीटर पावसाची नोंद झाली आहे.

मागील दोन दिवसांपासून लोणावळा शहर आणि उपनगरांमध्ये मुसळधार पाऊस सुरू असून जनजीवन विस्कळीत झाले आहे. शहरातून वाहणाऱ्या इंद्रायणी नदीच्या पात्राला मोठ्या प्रमाणात पाणी आले असून, ग्रामीण भागात ओढे-नाले ओसंडून वाहू लागले आहेत. ग्रामीण भागात इंद्रायणी नदीला पूर आला आहे. वाकसई चाळ, कार्ला, मळवली परिसरातील अनेक सोसायट्यांमध्ये पुराचे पाणी घुसले आहे.

कमी दाबाच्या क्षेत्रामुळे राज्यात पावसाला पोषक स्थिती निर्माण झाली असून पुढील चार ते पाच दिवस राज्यात अतिवृष्टी ते मुसळधार स्वरूपाचा पाऊस कोसळणार असल्याचा अंदाज आहे.

हुडको कॉलनीत पाणी शिरण्याची भीती

मावळ परिसरात पावसाचा जोर वाढला असल्याने सर्व नद्या धोक्याची पातळी ओलांडून वाहू लागल्याने पूरस्थितीत वाढ होत आहे. लोणावळा धरणातील पाणीसाठ्यात वाढ झाली आहे. ही परिस्थिती अशीच राहिल्यास नैसर्गिकरीत्या लोणावळा धरणातून पाण्याचा विसर्ग सुरू होऊ शकतो. त्यामुळे येथील हुडको कॉलनी आणि परिसरात पाणी शिरण्याची भीती आहे.

कार्ला, मळवलीत इंद्रायणी नदीस पूर

कार्ला, मळवली परिसरात इंद्रायणी नदीच्या पात्रात मोठ्या प्रमाणात पाणी आल्याने पूर आला आहे. मळवली-देवले रस्ता पूर्णपणे पाण्याखाली गेला असून मळवली, पाटण परिसरातील सोसायट्यांमध्ये पाणी शिरले आहे. नागरिकांनी सतर्क राहावे, असे आवाहन करण्यात आले आहे.