पिंपरीत 'पीएमएवायमध्ये आता हक्काचं मोठं घर,उत्पन्न मर्यादेमध्येही वाढ

- योजनेच्या पहिल्या टप्प्यात लाभार्थ्यांना ३० चौरस मीटर चटई क्षेत्राची सदनिका देण्यात येत होती. मात्र, पीएमएवाय २.० अंतर्गत आता ४५ चौरस मीटर क्षेत्रफळाचे घर देण्यात येणार

पिंपरी : पिंपरी-चिंचवडमधील शहरी गरजू, मध्यमवर्गीय आणि झोपडपट्टीवासीयांसाठी एक दिलासादायक बातमी आहे. केंद्र सरकारच्या पंतप्रधान आवास योजना २.० अंतर्गत आता अधिकाधिक कुटुंबांना हक्काचे घर मिळण्याचा मार्ग मोकळा झाला आहे. या नव्या टप्प्यात केवळ घराचे क्षेत्रफळ वाढवण्यात आलेले नाही, तर उत्पन्न मर्यादेतही लक्षणीय वाढ करून अधिक नागरिकांना या योजनेत समाविष्ट करण्यात आले आहे.

आता मिळणार अधिक मोठे आणि दर्जेदार घर

योजनेच्या पहिल्या टप्प्यात लाभार्थ्यांना ३० चौरस मीटर चटई क्षेत्राची सदनिका देण्यात येत होती. मात्र, पीएमएवाय २.० अंतर्गत आता ४५ चौरस मीटर क्षेत्रफळाचे घर देण्यात येणार आहे. त्यामुळे कुटुंबांना अधिक मोकळे, व्यवस्थित आणि सुसज्ज घर मिळेल. केवळ आकारातच नव्हे, तर गृहप्रकल्पांच्या गुणवत्तेमध्येही सुधारणा करण्यात येणार आहे.

उत्पन्न मर्यादेत वाढ - अधिक नागरिकांना लाभ

पूर्वी फक्त ३ लाख रुपयांपर्यंत उत्पन्न असलेल्या नागरिकांनाच योजनेचा लाभ मिळत होता. त्यामुळे अनेक मध्यमवर्गीय कुटुंबे अपात्र ठरत होती. आता ही मर्यादा ६ लाख रुपयांपर्यंत वाढवली आहे, जे या शहरातील अनेक नोकरी करणाऱ्या नागरिकांसाठी फार मोठा दिलासा आहे. परिणामी, हजारो नवोदित कुटुंबांना स्वतःचे घर घेण्याची सुवर्णसंधी उपलब्ध झाली आहे.

शहरात नऊ ठिकाणी प्रकल्प – टप्प्याटप्प्याने राबवणार योजनेची अंमलबजावणी

पिंपरी-चिंचवड महापालिकेने या योजनेंतर्गत नऊ ठिकाणी भूखंड आरक्षित केले असून, त्या ठिकाणी टप्प्याटप्प्याने गृहप्रकल्प उभारले जाणार आहेत. आधीच चऱ्होली, आकुर्डी, बोऱ्हाडेवाडी आणि पिंपरी येथे प्रकल्प पूर्ण झाले असून, डुडूळगाव प्रकल्पाचे काम सुरू आहे. रावेतमधील प्रकल्प रद्द झाला असला, तरी त्या लाभार्थ्यांना किवळेमधील सदनिका देण्यात येत आहेत.
 

उत्पादनात वाढ - बांधकाम क्षेत्राला चालना
या योजनांमुळे केवळ नागरिकांना हक्काचे घर मिळणार नाही, तर बांधकाम व रिअल इस्टेट क्षेत्रालाही मोठी चालना मिळणार आहे. सदनिकांच्या संख्येत वाढ झाल्यामुळे स्थानिक पातळीवर रोजगारनिर्मिती वाढेल, तसेच अर्थव्यवस्थेलाही बळकटी मिळेल. सिमेंट, लोखंड, विजेची उपकरणे, फर्निचर, वॉटर फिटिंग्स यांसारख्या उत्पादनांमध्येही वाढ होण्याची शक्यता आहे.
 

झोपडपट्टीवासीयांचा समावेश - समाजमुखी पाऊल
पीएमएवाय २.० मध्ये पात्र झोपडपट्टीवासीयांचाही समावेश करण्यात आला आहे. यामुळे खऱ्या अर्थाने ‘घर सबका’ हे स्वप्न साकार होण्याच्या दिशेने एक महत्त्वाचे पाऊल टाकण्यात आले आहे. आर्थिक दुर्बल घटकांसाठी आरक्षित ९ भूखंड आणि एचडीएचअंतर्गत निश्चित भूखंडांवर हे प्रकल्प उभारले जाणार आहेत.
 

या योजनेचे ठळक फायदे :
सदनिकेच्या क्षेत्रफळात वाढ : ३० चौरस मीटरवरून ४५ चौरस मीटर

उत्पन्न मर्यादेत वाढ : ३ लाख वरून ६ लाख रुपये
झोपडपट्टीवासीयांनाही संधी : पात्रतेनुसार समावेश

बांधकाम क्षेत्राला चालना : रोजगार आणि उत्पादन वाढ
नऊ ठिकाणी गृहप्रकल्पांची आखणी : महापालिकेचा पुढाकार

प्रथमच घर घेणाऱ्यांसाठी सुवर्णसंधी
ही योजना केवळ घर देणारी नाही, तर ती अनेकांचे भविष्य उजळवणारी आहे. क्षेत्रफळ, उत्पन्न मर्यादा आणि गुणवत्तेतील सुधारणा यामुळे पिंपरी-चिंचवडमधील हजारो नागरिकांना या योजनेचा खऱ्या अर्थाने लाभ मिळणार आहे. -  संजय कुलकर्णी, मुख्य अभियंता, पिंपरी-चिंचवड महापालिका.