महाराष्ट्रातील बेस्ट पर्यटन स्थळे क्लिक करा, ५ लाख जिंका; शासनाची अनोखी स्पर्धा, काय आहेत अटी?

राज्यातील पर्यटन स्थळांचा प्रचार करण्यासाठी महाराष्ट्र पर्यटन विकास महामंडळातर्फे (एमटीडीसी) ‘तुमच्या नजरेतून महाराष्ट्रातील पर्यटन स्थळे’ हा उपक्रम राबवला जात आहे.

या उपक्रमाअंतर्गत सर्वोत्तम छायाचित्राला पाच लाखांचे प्रथम पारितोषक देण्यात येईल. पर्यटन स्थळांचे सौंदर्य, वैविध्य, ऐतिहासिक आणि सांस्कृतिक ठिकाणांची ओळख वाढवणे हा  त्यामागील उद्देश आहे. 

निवडक छायाचित्रे, ‘फोटो ऑफ द डे’, ‘फोटो ऑफ दी मन्थ’, ‘फोटो ऑफ द इअर’ या श्रेणीमध्ये विभागणी करून समाजमाध्यमांवर प्रसिद्ध करण्यात येतील. ‘फोटो ऑफ द इअर’ या श्रेणींसाठी नामवंत पर्यटन क्षेत्रातील तज्ज्ञ व्यक्तींच्या समितीकडून छायाचित्र निवडण्यात येतील.

प्रथम विजेत्यास पाच लाख रुपये, प्रथम उपविजेत्यास एक लाख रुपये, द्वितीय उपविजेत्यास ७५ हजार रुपये बक्षीस देण्यात येणार आहे. फोटोसाठी निकष आणि शर्तीही ठेवण्यात आल्या आहेत.

फोटो स्वतः काढलेला असावा. उच्च दर्जा, मौलिकता व स्थानिक वैशिष्ट्यांचे प्रतिबिंब महत्त्वाचे ठरेल. बदल केलेले अथवा एडिटेड फोटो ग्राह्य धरले जाणार नाहीत. 

फोटोंची निवड करताना तज्ज्ञ समिती छायाचित्रांचा दर्जा व वैशिष्ट्ये तपासून विजेते निवडेल. त्याचसोबत सार्वजनिक मतदानाचाही विचार होईल. या उपक्रमातून महाराष्ट्राच्या पर्यटनाची एक नवी ओळख तयार होईल. 

प्रवाशांनी टिपलेली छायाचित्रे हेच खरी जाहिरात माध्यम ठरणार आहेत, असे मत अधिकाऱ्यांनी व्यक्त केले.  ही स्पर्धा सर्वांसाठी खुली असून, इच्छुकांना ‘एमटीडीसी’च्या अधिकृत संकेतस्थळावर छायाचित्रे अपलोड करावी लागतील.

रिसॉर्टमध्ये विनामूल्य वास्तव्य - ‘फोटो ऑफ दि मन्थ’च्या विजेत्यांना दोन जणांसाठी तीन दिवस, दोन रात्री ‘एमटीडीसी’च्या रिसॉर्टमध्ये विनामूल्य राहता येईल. ‘फोटो ऑफ द डे’, ‘फोटो ऑफ द मन्थ’ची निवड समाजमाध्यमावरून मतदानावर आधारित निकषानुसार केली जाईल.

काय आहे योजना? - स्वतः टिपलेली छायाचित्रे पाठवावी लागतील. त्या माध्यमातून पर्यटनस्थळांचा प्रचार, प्रसिद्धी केली जाईल. निवडक छायाचित्रांचा वापर पर्यटन प्रसिद्धीसाठी केला जाईल. विविध श्रेणींत फोटोंची निवड केली जाईल.

त्यामध्ये किल्ले, समुद्रकिनारे, हिल स्टेशन, धार्मिक स्थळे आदी विभागानुसार फोटो स्वीकारले जातील. प्रत्येकी ५० हजार रुपयांची पाच उत्तेजनार्थ पारितोषिके देण्यात येणार आहेत.