फक्त 5000 रुपयांमध्ये उघडा स्वतःच्या मालकीचे मेडिकल स्टोअर, मोदी सरकार करणार मदत

'प्रधानमंत्री जन औषधी केंद्र' सुरू करण्यासाठी केंद्र सरकार आर्थिक मदत करत आहे.

तुम्ही स्वतःचे मेडिकल स्टोअर सुरू करण्याचा विचार करत असाल तर केंद्र सरकार तुम्हाला एक उत्तम संधी देत ​​आहे. याद्वारे तुम्ही अगदी कमी गुंतवणुकीत स्वतःचा व्यवसाय सुरू करू शकता. आम्ही तुम्हाला 'प्रधानमंत्री भारतीय जन औषधी केंद्रा'बद्दल माहिती देणार आहोत. या दुकानांची संख्या देशात सातत्याने वाढत आहे आणि हे तुमच्यासाठीही कमाईची मोठी संधी ठरू शकते. या केंद्रांद्वारे लोकांना स्वस्त दरात औषधे उपलब्ध करून देणे, हे सरकारचे उद्दिष्ट आहे.

आतापर्यंत देशात 9,400 हून अधिक प्रधानमंत्री जनऔषधी केंद्रे उघडण्यात आली असून त्यांची संख्या आणखी वाढवण्यावर सरकार भर देत आहे. केंद्र सरकारने देशात आणखी 2,000 जनऔषधी केंद्रे सुरू करण्यास मान्यता दिली आहे. यापैकी 1,000 केंद्रे ऑगस्ट 2023 पर्यंत उघडली जातील, तर उर्वरित 1,000 केंद्रे वर्षाच्या अखेरीस म्हणजे डिसेंबर 2023 पर्यंत सुरू होतील. या केंद्रांमध्ये 1800 प्रकारची औषधे आणि 285 वैद्यकीय उपकरणे ठेवण्यात आली आहेत. सर्वात महत्त्वाची बाब म्हणजे ब्रँडेड औषधांच्या तुलनेत जनऔषधी केंद्रांवर 50 ते 90 टक्के कमी किमतीत औषधे उपलब्ध आहेत.

प्रधानमंत्री जनऔषधी केंद्र उघडण्यासाठी तुम्हाला अर्ज करावा लागेल, ज्याची फी 5,000 रुपये आहे. हे केंद्रे उघडण्यासाठी अर्जदाराने डी. फार्मा किंवा बी. फार्माचे शिक्षण घेतलेले असावे. याशिवाय, तुमच्याकडे केंद्र उघडण्यासाठी पुरेशी जागा असावी, ज्याचे क्षेत्रफळ सुमारे 120 चौरस फूट निश्चित करण्यात आले आहे. अर्ज प्रक्रियेदरम्यान विशेष श्रेणी आणि विशेष क्षेत्राच्या अर्जदारांसाठी शुल्कात सूट देण्याची तरतूद देखील करण्यात आली आहे.

प्रधानमंत्री जनऔषधी केंद्र उघडल्यानंतर सरकारकडून प्रोत्साहन रकमेच्या स्वरूपात आर्थिक मदत दिली जाते. 5 लाख रुपयांपर्यंत औषध खरेदीवर 15 टक्के किंवा जास्तीत जास्त 15,000 रुपयांपर्यंतची सूट मिळते. याशिवाय, दुकानाच्या इन्फ्रास्ट्रक्चरसाठी सरकारकडून दोन लाख रुपयांची मदत केली जाते.

अर्जासाठी आवश्यक कागदपत्रे- आधार कार्ड,फार्मासिस्ट नोंदणी प्रमाणपत्र,पॅन कार्ड,मोबाईल नंबर,पत्त्याचा पुरावा. अर्ज करण्यासाठी या janaushadhi.gov.in अधिकृत वेबसाइटला भेट द्या. होम पेजवरील मेनूमधील Apply For Kendra या पर्यायावर क्लिक करा. नवीन पानावरील Click Here To Apply या पर्यायावर क्लिक करा.

आता साइन इन फॉर्म उघडेल, ज्याच्या खाली Register now पर्याय निवडा. हे केल्यानंतर, नोंदणी फॉर्म तुमच्या स्क्रीनवर उघडेल, त्यात मागितलेली माहिती भरा. यानंतर, ड्रॉप बॉक्समध्ये राज्य निवडा आणि आयडी-पासवर्ड टाका. यानंतर नियम आणि अटींवर टिक करा आणि नंतर सबमिट पर्यायावर क्लिक करा. आता PM जन औषधी केंद्रासाठी तुमची ऑनलाइन अर्ज प्रक्रिया पूर्ण होईल.