शेअर बाजारात 'रेड अलर्ट'! 'या' ६ कारणांमुळे सेन्सेक्स-निफ्टी आपटले; तुमच्या पैशांचं काय झालं?

Stock Market Crash : आठवड्याच्या शेवटच्या व्यवहार दिवशी, म्हणजे शुक्रवारी, भारतीय शेअर बाजारात मोठी घसरण दिसून आली. गुंतवणूकदारांमध्ये चिंतेचे वातावरण निर्माण झाले होते. सेन्सेक्स सुमारे ७२१ अंकांनी घसरून ८१,४६३ अंकांवर बंद झाला, तर निफ्टी २२५ अंकांनी घसरून २४,८३७ अंकांवर पोहोचला.

या घसरणीमुळे मिडकॅप आणि स्मॉलकॅप समभागांमध्येही जोरदार विक्री झाली. बजाज फायनान्स, श्रीराम फायनान्स, बजाज ऑटो आणि हिरो मोटोकॉर्प यांसारख्या प्रमुख समभागांमध्ये मोठ्या प्रमाणात विक्री झाल्याने बाजाराची स्थिती आणखी बिकट झाली. या मोठ्या घसरणीमागे कोणती प्रमुख कारणे आहेत, ते सोप्या भाषेत समजून घेऊया.

बजाज फायनान्सने पहिल्या तिमाहीत २२% नफा वाढवून ४,७६५ कोटी मिळवला असला तरी, त्यांच्या दुचाकी/तीन चाकी आणि एमएसएमई (MSME) कर्जांमध्ये क्रेडिट कॉस्ट वाढला आहे. फेब्रुवारीपासून एमएसएमई पोर्टफोलिओमध्ये ताण दिसून येत आहे आणि दुसऱ्या तिमाहीत मंद वाढीचा इशारा देण्यात आला आहे. या निकालांनंतर, बजाज फायनान्सचा शेअर ६% ने घसरला, ज्यामुळे संपूर्ण वित्तीय क्षेत्रावर नकारात्मक परिणाम झाला.

इंडिया VIX (अस्थिरता निर्देशांक) ७% ने वाढून ११.४३ वर पोहोचला. जेव्हा हा निर्देशांक वाढतो, तेव्हा ते बाजारात व्यापाऱ्यांची चिंता आणि भीती वाढल्याचे दर्शवते. यामुळे मोठ्या प्रमाणात विक्रीचा दबाव येतो.

डॉलरच्या तुलनेत रुपया १९ पैशांनी घसरून ८६.५९ वर पोहोचला. परकीय संस्थात्मक गुंतवणूकदारांच्या (FII) विक्रीमुळे आणि शेअर बाजारातील घसरणीमुळे रुपयावर दबाव आला, ज्यामुळे आयात महाग होऊ शकते.

परकीय संस्थात्मक गुंतवणूकदारांकडून (FII) बाजारात सतत विक्री सुरू आहे. फक्त गुरुवारी २,१३४ कोटींची निव्वळ विक्री झाली. गेल्या चार दिवसांत, एफआयआयने ११,५७२ कोटींची मोठी विक्री केली आहे. ही विक्री बाजारावर खूप जास्त दबाव निर्माण करत आहे.

जागतिक बाजारातूनही नकारात्मक संकेत मिळत आहेत. जपानचा निक्केई, चीनचा शांघाय आणि हाँगकाँगचा हँग सेंग हे सर्व निर्देशांक लाल रंगात (घसरणीसह) होते. अमेरिकन बाजारपेठेतही संमिश्र व्यापार झाला, ज्यामुळे जागतिक बाजारातील अनिश्चितता आणखी वाढली.

आंतरराष्ट्रीय बाजारात ब्रेंट क्रूड फ्युचर्स ०.३९% वाढून ६९.४५ डॉलर प्रति बॅरलवर पोहोचले. भारतासारख्या तेल आयात करणाऱ्या देशासाठी ही चिंतेची बाब आहे, कारण यामुळे देशांतर्गत महागाई वाढण्याची भीती असते. या सर्व कारणांमुळे आज भारतीय शेअर बाजारात मोठी घसरण दिसून आली. पुढील आठवड्यात बाजाराची स्थिती कशी राहते हे पाहणे महत्त्वाचे ठरेल.