फक्त किराणाच नाही तर मॉलमध्ये शॉपिंगपासून ते सिनेमापर्यंत या गोष्टींवर भरघोस बचत; पाहा यादी

New GST Rates in India : जीएसटी कपातीचा निर्णय सोमवारी २२ सप्टेंबरपासून देशभरात लागू झाला आहे. यामुळे सर्वसामान्यांमध्ये उत्साह पाहायला मिळत आहे. चला तुमची कुठे-कुठे बचत होईल ते पाहू.

जेव्हा आपण मॉलमध्ये जातो, तेव्हा तिथे फक्त फिरणेच नाही, तर खरेदी करणे, रेस्टॉरंटमध्ये जेवण करणे आणि सिनेमा पाहणे असे अनेक गोष्टी करतो. या सर्व गोष्टींवर आपण जीएसटीचा भरमसाठ खर्च करत असतो. पण आता २२ सप्टेंबर २०२५ पासून लागू झालेल्या जीएसटी दरांतील बदलांमुळे, पुढच्या वेळी मॉलला भेट दिल्यावर तुमच्या खिशावरील भार नक्कीच कमी होईल. चला, तुमच्या आवडत्या ५ कामांवर झालेल्या कर कपातीचा परिणाम समजून घेऊया.

मॉलमध्ये गेल्यानंतर कपडे आणि बूट्सच्या खरेदीवर तुम्हाला जीएसटी कपातीचा मोठा फायदा मिळेल. जीएसटी रिफॉर्मनुसार, आता ₹२,५०० किंवा त्यापेक्षा कमी किमतीच्या सर्व कपड्यांवर (साडी, शर्ट, ट्राउझर, तयार कपडे) १२% ऐवजी ५% जीएसटी लागू होईल.

उदाहरणार्थ, जर तुम्ही ₹२,००० चा शर्ट खरेदी केला, तर पूर्वी त्यावर ₹२४० जीएसटी लागत होता. आता तो फक्त ₹१०० होईल, ज्यामुळे थेट ₹१४० ची बचत होईल. कपड्यांप्रमाणेच ₹२,५०० पेक्षा कमी किमतीच्या पादत्राणांवरही १२% ऐवजी फक्त ५% जीएसटी द्यावा लागेल.

कपडे-बुटांव्यतिरिक्त, मॉलमध्ये असलेल्या रिटेल स्टोअर्समधून लोक घरासाठी किराणा आणि इतर वस्तूंचीही मोठ्या प्रमाणात खरेदी करतात. जीएसटी स्लॅबमध्ये झालेल्या बदलांमुळे, आता रोजच्या वापरातील सुमारे ९९% वस्तू ५% किंवा ०% जीएसटी श्रेणीत आल्या आहेत. त्यामुळे या वस्तूंवर मोठी बचत होणार आहे.

पॅकेज्ड पीठ, डाळी आणि तांदूळ यांच्यावर आधीप्रमाणे ५% जीएसटी राहील, पण तेल, शॅम्पू आणि साबण १८% वरून थेट ५% जीएसटी स्लॅबमध्ये आले आहेत. यामुळे प्रत्येक १०० रुपयांच्या खरेदीवर १३ रुपयांची बचत होईल. लहान मुलांसाठी पास्ता, कॉर्नफ्लेक्स, नूडल्स, बिस्किटे आणि नमकीन यांसारख्या वस्तूंचे दर १२-१८% वरून ५% वर आले आहेत. ब्रेड आणि ब्रेडपासून बनलेल्या वस्तूंवर तर आता जीएसटीच नाही.

सरकारने सिनेमा तिकिटांवरील जीएसटी दरही कमी केले आहेत. १०० रुपयांपर्यंतच्या तिकिटांवर १२% ऐवजी ५% जीएसटी लागेल. मात्र, मॉलमध्ये असलेल्या मल्टिप्लेक्समध्ये सिनेमा पाहणाऱ्यांसाठी हा फायदा मिळणे थोडे कठीण आहे, कारण मल्टिप्लेक्समधील तिकिटांची किंमत यापेक्षा जास्त असते. पण काही शहरांमधील सिंगल स्क्रीन थिएटरमध्ये याचा नक्कीच फायदा होईल.

मॉलमध्ये अनेक मोठे सलून, स्पा आणि योगा सेंटर्स असतात. आता या सेवांवर १८% (इनपुट टॅक्स क्रेडिटसह) ऐवजी ५% (आयटीसीशिवाय) जीएसटी लागू करण्यात आला आहे. यामुळे या सेवा स्वस्त झाल्या आहेत. उदाहरणार्थ, जर एखाद्या सेवेसाठी ₹२,००० खर्च येत असेल, तर त्यावर पूर्वी ₹३६० जीएसटी लागत होता, जो आता फक्त ₹१०० लागेल. हा बदल केवळ मॉलमध्ये असलेल्या मोठ्या सलूनसाठीच नाही, तर लहान सलूनसाठीही लागू आहे.

सरकारने खाद्यपदार्थ आणि त्यात वापरल्या जाणाऱ्या वस्तू (उदा. लोणी, चीज, पिझ्झा ब्रेड, नूडल्स) यांच्यावरील कर कमी केले आहेत. यामुळे मॉलमध्ये असलेल्या फूड कोर्टमध्ये या पदार्थांपासून बनवलेल्या खाण्यापिण्याच्या किमतींवरही जीएसटी कपातीचा परिणाम दिसू शकतो.

जरी रेस्टॉरंटच्या सेवांवर थेट जीएसटी कपात जाहीर झाली नसली तरी, अमूल आणि मदर डेअरीसारख्या कंपन्यांनी जीएसटी कपातीचा १००% फायदा ग्राहकांना देण्याचे जाहीर केले आहे. त्यामुळे, लवकरच रेस्टॉरंटमधील कॉफी, बर्गर, पिझ्झा आणि इतर खाद्यपदार्थांच्या बिलांमध्येही घट होण्याची अपेक्षा आहे.

याशिवाय, अनेक गोष्टींवर जीएसटी कमी करण्यात आला आहे. मॉलमध्ये मोठ्या प्रमाणात खरेदी केल्या जाणाऱ्या एसी (AC), टीव्ही (TV) आणि फ्रीजसारख्या इलेक्ट्रॉनिक वस्तूंवरील कर २८% वरून १८% करण्यात आला आहे.

त्याचबरोबर लहान मुलांची खेळणी, बाहुल्या, स्टेशनरी आणि कलाकुसरीच्या वस्तूंवरही ५% किंवा ०% जीएसटी लागू आहे. यामुळे सणासुदीच्या काळात खरेदीचा आनंद आणखी वाढणार आहे.