परभणी जिल्ह्यात ९ ठिकाणी 'EVM'मध्ये बिघाड; दुपारनंतर मतदान केंद्रांवर रांगा

परभणी जिल्ह्यातील ५४ जिल्हा परिषद गट व १०८ पंचायत समिती गणासाठी शनिवारी मतदानाला सुरुवात झाली.

संतोष मगर 
परभणी: जिल्हा परिषद व पंचायत समितीच्या निवडणुकीसाठी शनिवारी सकाळी साडेसात वाजता जिल्ह्यातील १२७८ मतदान केंद्रावर मतदान प्रक्रियेला सुरुवात झाली. सकाळी रोडवलेली गर्दी दुपारी मात्र केंद्रावर मतदारांच्या रांगा दिसून आल्या. दुपारी दीड वाजेपर्यंत ३९.६५ टक्के मतदान झाले. 

परभणी जिल्ह्यातील ५४ जिल्हा परिषद गट व १०८ पंचायत समिती गणासाठी शनिवारी मतदानाला सुरुवात झाली. जिल्ह्यातील १२७८ मतदान केंद्रावर ही मतदान प्रक्रिया होत आहे. सकाळपासूनच ग्रामीण विविध मतदान केंद्रावर मतदारांनी गर्दी केली होती. काही ठिकाणी रोडावलेली मतदारांची संख्या दुपारनंतर वाढल्याचे दिसून आले. सकाळी साडेनऊ वाजेपर्यंत जिल्ह्यात सरासरी ८.९२ टक्के मतदान झाले होते. दुपारी दीड वाजेपर्यंत जिंतूर मध्ये ३८.३९ टक्के, परभणी ४०.०६, मानवत ३७.५६, सेलू ४३.१९, पाथरी ४०.०८, सोनपेठ, ३८.७७, पूर्णा ४१.६३, पालम ३९.७४, गंगाखेड ३७.४५ टक्के मतदान झाले असून सरासरी जिल्ह्यात दुपारी दीड वाजेपर्यंत ३९.६५ टक्के मतदारांनी मतदानाचा हक्क बजावल्याचे निवडणूक विभागाकडून सांगण्यात आले. मतदान केंद्र बाहेर पोलिसांनी तगडा बंदोबस्त ठेवला होता.

९ ठिकाणी मतदान यंत्रात तांत्रिक बिघाड
जिल्ह्यात ९ ठिकाणी मतदान मशीनमध्ये तांत्रिक बिघाड झाल्याने मतदान प्रक्रिया काही वेळ थांबली होती. मात्र वेळीच दुरुस्ती केल्याने मतदान प्रक्रिया पूर्ववत झाली.