ऑटोचालकाच्या खुनातील आरोपी शोधासाठी आठ पथके; नानलपेठ पोलिस ठाण्यात अज्ञातावर गुन्हा

- राजन मंगरुळकर

परभणी : शहरातील नांदखेडा रोड भागात शनिवारी दुपारी झालेल्या ऑटो चालकाच्या खून प्रकरणात पोलिस अधीक्षक रवींद्रसिंह परदेशी यांनी आरोपीच्या शोधासाठी आठ पथकांची स्थापना केली आहे. रविवारी या पथकांकडून आरोपीचा शोध घेण्याची प्रक्रिया सुरू होती. यासाठी शनिवारी सायंकाळपासून या घटनेत सीसीटीव्हीच्या माध्यमातून आरोपीच्या शोधाची प्रक्रिया सुरू झाली आहे.

याप्रकरणी शनिवारी रात्री उशिरा अज्ञात इसमाविरुद्ध खुनाचा गुन्हा नोंद करण्यात आला. याप्रकरणी मयताचा भाऊ सय्यद आसेफ सय्यद गफूर (रा.पाकीजा मोहल्ला, जुनी जिल्हा परिषद समोर) यांनी फिर्याद दिली आहे. यामध्ये मयत सय्यद अकबर उर्फ बब्बू सय्यद गफूर हा त्याचा ऑटो क्रमांक (एमएच २२ एपी १८५२) नांदखेडा रोडने सोमनाथ नगर कमानीच्या आतमध्ये मयत आढळून आला. त्याचा अज्ञात इसमाने अज्ञात कारणासाठी चाकूने गळा चिरून खून केल्याची फिर्याद दाखल करण्यात आली. तपास सहाय्यक पोलिस निरीक्षक खजे करीत आहेत.

एलसीबीची चार, नानलपेठची चार पथके

पोलिस अधीक्षक रवींद्रसिंह परदेशी यांनी या प्रकरणात दोन स्वतंत्र पथके तयार केली. स्थानिक गुन्हा शाखेची चार पथके पोलिस निरीक्षक विवेकानंद पाटील यांच्या मार्गदर्शनात तर नानलपेठची चार पथके पोलिस निरीक्षक गणेश कदम यांच्या मार्गदर्शनात तयार केली आहेत. यामध्ये सायबर तज्ञांसह गुन्हेगाराच्या शोधासाठी ८ अधिकारी, ३२ कर्मचाऱ्यांकडून तपास सुरू आहे.