नवी दिल्ली : सर्वप्रथम कौशल्य नसताना केवळ ताकदीच्या भरवशावर विश्वविजेतेपद पटकावणाऱ्या एम. सी. मेरीकोमने एकही पंच न गमावता विजय मिळवण्याचा प्रयत्न करण्याच्या टप्प्यावर पोहचली असल्याचे म्हटले आहे.
तीन अपत्यांची आई ३६ वर्षीय मेरीकोमने शनिवारी सहावे विश्वविजेतेपद पटकावले. विश्व चॅम्पियनशिपमध्ये हे तिचे सातवे पदक आहे. विशेष म्हणजे स्पर्धेच्या दहा वर्षांच्या इतिहासात ती सर्वांत यशस्वी बॉक्सर ठरली आहे.
मणिपूरची ही बॉक्सर म्हणाली,‘२००१ ते आतापर्यंतच्या विश्व चॅम्पियनशिपच्या प्रवासाची आठवण ताजी आहे. अमेरिकेमध्ये १७ वर्षांपूर्वी रौप्यपदकासह सुरुवात करणाºया मेरीकोमने गेल्या आठवड्यात स्थानिक प्रेक्षकांच्या साक्षीने सहावे सुवर्णपदक पटकावले.मेरकोम म्हणाली, ‘२००१ मध्ये मी युवा व अनुभवहीन होती. माझ्याकडे कुठले कौशल्य नव्हते. केवळ ताकदीवर अवलंबून होती. पण, २०१८ मध्ये माझ्याकडे एवढा अनुभव आहे की, मी स्वत:वर दडपण येऊ दिले नाही. मी आता पंच खाण्यास इच्छुक नाही. त्याविना लढत जिंकण्याला प्राधान्य असते. यावेळी मी त्याच रणनीतीने यशस्वी ठरली. मी आता विचारपूर्वक खेळते.’
यापूर्वी २००६ मध्ये मेरीकोमने दिल्लीमध्ये विश्वविजेतेपद पटकावले होते, पण त्यावेळी तिच्या डोळ्यातून आनंदाश्रू तराळले नव्हते. त्यावेळी तिच्या चेहºयावर आनंद ओसांडून वाहत होता, पण यावेळी तिरंगा उंचावताना आणि राष्ट्रगीत सुरू असताना तिच्या डोळ्यात अश्रू दिसले.मेरीकोम म्हणाली, ‘कदाचित हाईप व दबावामुळे हे घडले असावे. त्यावेळी महिला बॉक्सिंगला एवढी लोकप्रियता नव्हती. यावेळी प्रेक्षकांमध्ये माझ्या नावाचा जयघोष केला. अखेरच्या दिवशी मला अश्रू आवरता आले नाही.’
मेरीकोम पुढे म्हणाली, ‘माझ्या कारकीर्दीतील विशेष पदकांपैकी एक आहे. सर्वांत विशेष कुठले पदक आहे, हे मला सांगता येत नाही. कारण प्रत्येक पदकासाठी तेवढीच मेहनत घेतली आहे. यावेळी अपेक्षा अधिक असल्यामुळे हे सर्वांत कठीण पदकांपैकी एक होते. मी राष्ट्रकुल विजेती असल्याने या स्पर्धेत माझ्यावर दडपण होते.’आॅलिम्पिकमध्ये ५१ किलो वजन गटाचा समावेश असल्यामुळे आणि ४८ किलो वजनगट वगळण्यात आल्यानंतर मेरीकोम दोन्ही वजनगटात खेळत आहे. तिने सर्व विश्वविजेतेपद ४८ किलो वजनगटात आणि आॅलिम्पिक कांस्य ५१ किलो वजन गटात पटाकवले होते.वजनगट बदलणे सोपे नाहीटोकियो आॅलिम्पिकमध्ये तिला पुन्हा एकदा पात्रता स्पर्धेत ५१ किलो गटात खेळावे लागले. ती म्हणाली, ‘हे सोपे नाही. यासाठी अधिक परिश्रमाची गरज असते, पण मी पूर्ण प्रयत्न करणार आहे.’आपल्या कामगिरीबाबत बोलताना मेरीकोम म्हणाली, ‘हे यश मिळवणारी पहिला महिला बॉक्सर ठरल्यामुळे आनंद झाला. प्रत्येकाचे स्वप्न असते आणि मी माझे स्वप्न साकार करण्यात यशस्वी ठरल्यामुळे खूश आहे.’