ऑनलाइन लोकमत
मुंबई, दि. १० - दोन वर्षांपूर्वी झालेल्या स्पॉट फिक्सिंगप्रकरणामुळे विवादात सापडलेल्या इंडियन प्रिमिअर लिगच्या ( आयपीएल) सध्या सुरू असलेल्या ८ व्या पर्वावरही स्पॉट फिक्सिंगचे सावट दिसत असल्याचे वृत्त आहे. एका इंग्रजी वृत्तपत्रानुसार राजस्थान रॉयल्स संघाच्या खेळाडूला रणजी ट्रॉफीतील संघ सहका-याने फिक्सिंगची ऑफर दिली होती. याप्रकरणी त्या खेळाडूने बीसीसीआयच्या अॅन्टी करप्शन विभागाकडे तक्रार केली होती. आता यावर बीसीसीआय काय पाऊल उचलते हे पहावे लागेल.
आयपीएल ८ मध्ये आजच राजस्थान रॉयल्सचा पहिलाच सामना किंग्स इलेव्हन पंजाबविरोधात रंगणार असून, त्या पार्श्वभूमीवर आलेल्या या बातमीने खळबळ माजली आहे. राजस्थान रॉयल्स संघातील हा खेळाडू मुंबईस्थित असून त्याला रणजी ट्रॉफीतील संघ सहका-याने ही ऑफर दिली. मात्र त्या खेळाडूने ही ऑफर नाकारत एका वरिष्ठ अधिका-याला माहिती दिली आणि त्यांनी तडक अॅन्टी करप्शन अँड सिक्युरिटी विभागाकडे तक्रार नोंदवली.
रणजी सामन्यादंरम्यान आपण त्या खेळाडूसोबत ड्रेसिंग शेअर करत होतो. त्याने जेव्हा आपल्याला प्रथम फिक्सिंगची ऑफर दिली , तेव्हा तो मजा करत असावा असे आपल्याला वाटले होते, असे त्या खेळाडूने चौकशी दरम्यान सांगितले. मात्र ठरवून खेळी केल्यास त्यातून मिळणा-या पैशाचा विषय निघताच ती ऑफर सीरिअस असल्याचे आपल्या लक्षात आले असे त्याने सांगितले. याप्रकरणाची माहिती बीसीसीआयच्या वरिष्ठ अधिका-यांनाही देण्यात आली होती, असे वृत्तात नमूद करण्यात आले आहे.