नवी मुंबई पोलिसांची मतदान केंद्राबाबतची 'आयडिया' निवडणूक आयोगाने स्वीकारली

नवी मुंबई पोलिसांनी काय केला होता प्रयोग? जाणून घ्या

लोकमत न्यूज नेटवर्क, मुंबई: मतदान केंद्राच्या १०० मीटर अंतरापर्यंत मोबाइल  नेताच येणार नाही हा नियम बदलून आता मतदान केंद्रापर्यंत मोबाइल नेता येणार आहे, पण केंद्राच्या दरवाजावर लटकविलेल्या मोबाइल लॉकरमध्ये तो ठेवावा लागणार आहे. नवी मुंबईपोलिस आयुक्त कार्यालयाने विधानसभा निवडणुकीत वापरलेली ही आयडिया आता केंद्रीय निवडणूक आयोगाने स्वीकारली आहे.

राज्याचे मुख्य निवडणूक अधिकारी एस. चोक्कलिंगम यांनी ‘लोकमत’ला सांगितले की, या मोबाइल लॉकर सुविधेला  केंद्रीय निवडणूक आयोगाने हिरवा कंदील दाखविला आहे.  मात्र त्याबाबत अंतिम निर्णय घेण्याचे अधिकार स्थानिक प्रशासनाला देण्यात आले आहेत. हे लॉकर सर्वच केंद्रांवर वापरणे आयोगाला अपेक्षित असले तरी सुरक्षेच्या कारणावरून त्यास नकार देण्याबाबतचा निर्णय स्थानिक प्रशासन घेऊ शकेल.  

नवी मुंबई पोलिसांनी काय केला होता प्रयोग?

• विधानसभा निवडणुकीच्या काळात नवी मुंबई पोलिस आयुक्त कार्यालयाने मतदान केंद्रावर मोबाइल ठेवण्यासाठी एक लॉकर सुविधेचा प्रयोग केला होता. ज्यात जवळपास एकाच वेळी सहा ते सात मोबाइल ठेवण्याची व्यवस्था करण्यात आली होती.
• प्रत्येक रकान्यात संबंधित लॉकरची चावी ठेवण्यात आली होती. मतदारांनी या लॉकरमध्ये मोबाइल ठेवून त्याची चावी स्वत:जवळच ठेवण्याची मुभा होती. याचे एक प्रात्यक्षिक आयोगाकडे पाठविले होते. ज्याला आयोगाने सहमती दिली. नवी मुंबईचे पोलिस आयुक्त मिलिंद भारंबे यांच्या नेतृत्वात ही संकल्पना राबविली गेली होती.

मतदार ओळखपत्र मिळण्याचा अवधी कमी

• मतदारांना नव्याने मतदान ओळखपत्र मिळण्यासाठी जवळपास ४० ते ४५ दिवसांचा कालावधी लागत होता. या संपूर्ण प्रक्रियेत बदल करून आमच्या कार्यालयाने नवे ओळखपत्र अवघ्या १५ दिवसांत उपलब्ध करून देण्यासाठी नवी प्रक्रिया उभी केली असून, त्यालाही आयोगाने मंजुरी दिली आहे. 
• याबरोबरच मतदारांना आयोगाकडून देण्यात येणाऱ्या मतदानाच्या माहितीबद्दलच्या स्लीपमध्ये आता बदल केला जाणार आहे. यात आता एक नवा रकाना सामील केला जाणार असून, त्यात संबंधित मतदारांचा भाग क्रमांक आणि यादी क्रमांक ठळक अक्षरात नमूद करण्यात येणार आहे.