१२ वी उत्तीर्ण असलेले भाजपाचे नवे राष्ट्रीय अध्यक्ष नितीन नबीन यांच्याकडे एकूण संपत्ती किती?

२००६ साली पोटनिवडणुकीत विजय मिळवल्यानंतर २०१०, २०१५,२०२०, २०२५ या निवडणुकीत ते सातत्याने विधानसभेत आमदार म्हणून निवडून आलेत.

नवी दिल्ली - बिहारच्या राजकारणात पुढे येत राष्ट्रीय राजकारणात भाजपाच्या अध्यक्षपदी नितीन नबीन यांची अधिकृतपणे निवड झाली आहे. मंगळवारी त्यांच्या नावाची घोषणा पक्षाच्या मुख्यालयात झाली. बिहार सरकारमध्ये मंत्री राहिलेले नितीन नबीन बांकीपूर मतदारसंघातून सलग ५ वेळा आमदार बनले आहेत. बिहार विधानसभा निवडणुकीवेळी त्यांनी निवडणूक आयोगासमोर प्रतिज्ञापत्र सादर केले होते. त्यात त्यांनी त्यांच्या संपत्तीची माहिती दिली. ज्यानुसार १२ वी पर्यंत शिक्षण घेतलेले नितीन नबीन यांची संपत्ती ३ कोटीहून अधिक आहे.

३ कोटी संपत्ती, ५६ लाखांचं कर्ज

बिहारच्या राजकारणात नितीन नबीन यांचं मोठं नाव आहे. २००६ साली पोटनिवडणुकीत विजय मिळवल्यानंतर २०१०, २०१५,२०२०, २०२५ या निवडणुकीत ते सातत्याने विधानसभेत आमदार म्हणून निवडून आलेत. निवडणूक प्रतिज्ञापत्रानुसार, त्यांची एकूण संपत्ती ३.०६ कोटी इतकी आहे तर त्यांच्यावर ५६ लाखांचे कर्जही आहे. नितीन नबीन आणि त्यांच्या कुटुंबाकडे ६० हजार रोकड होती आणि पती-पत्नी दोघांच्या नावे विविध बँकांमध्ये ९८ लाख रूपये आहेत असं त्यांनी उमेदवारी अर्जावेळी दिलेल्या कागदपत्रातून माहिती दिली.

पत्नीची शेअर बाजारात गुंतवणूक 

भाजपाचे नवे राष्ट्रीय अध्यक्ष नितीन नबीन यांनी शेअर बाजारापासून अंतर ठेवले आहे परंतु त्यांची पत्नी शेअर बाजारातील गुंतवणूकदार आहे. त्यांनी मिडकॅप, मल्टीकॅप फंडमध्ये ६ लाखाहून अधिक गुंतवणूक केली आहे. नितीन नबीन यांच्याकडे ३ एलआयसी पॉलिसी आणि एक एचडीएफसी पॉलिसी आहे. पत्नीकडे एलआयसी, एसबीआय लाईफ इन्शुरन्स पॉलिसी आहे. त्याशिवाय Navira Enterprises मध्ये नितीन नबीन यांच्या पत्नी संचालिका आहेत. नितीन नबीन यांच्याकडे एक स्कोर्पिओ आणि एक इनोव्हा क्रिस्टा कार आहे. पती-पत्नी आणि मुलांकडे ११ लाख किंमतीचे सोने चांदी ज्वेलरी आहेत. त्यानुसार नितीन नबीन यांच्याकडे स्थावर मालमत्ता ९२.७१ लाख रुपयांची तर त्यांच्या पत्नी आणि मुलांकडे ६८ लाख रुपयांपेक्षा जास्त किमतीची जंगम मालमत्ता होती.

दरम्यान, भाजपाचे नवीन राष्ट्रीय अध्यक्ष नितीन नबीन यांच्याकडे कुठलीही शेतजमीन नाही, व्यावसायिक इमारती किंवा घरे नाहीत. त्यांच्या पत्नीकडे कोट्यवधी रुपयांची स्थावर मालमत्ता आहे. यामध्ये २८ लाख रुपयांची शेतजमीन आणि पाटण्यातील १.१८ कोटी रुपयांचे घर समाविष्ट आहे.