मुख्यमंत्र्यांच्या ताफ्यातील वाहनांत डिझेलऐवजी पाणी; मध्य प्रदेशातील प्रकार; सर्व वाहने पडली बंद

पाणीमिश्रित डिझेलची माहिती मिळताच नायब तहसीलदार आशिष उपाध्याय, अन्न व पुरवठा अधिकारी आनंद गोरे आणि अन्य अधिकाऱ्यांनी पेट्रोल पंपाची तपासणी करून तो तात्काळ सील केला. 

रतलाम : मध्य प्रदेशचे मुख्यमंत्री डॉ. मोहन यादव यांच्या ताफ्यातील १९ इनोव्हा गाड्यांमध्ये एका पेट्रोल पंपावर डिझेल भरण्यात आले. तिथून काही अंतर गेल्यानंतर एकामागून एक या सर्व गाड्या बंद पडल्या. या अनपेक्षित घटनेने सर्वजण चक्रावले. या गाड्यांमध्ये भरलेल्या डिझेलमध्ये पाणी मिसळल्याचे प्राथमिक तपासात निष्पन्न झाले. त्यामुळे हा पेट्रोल पंप सील करण्यात आला असून पुढील तपास सुरू आहे.

गुरुवारी रात्री इंदूरहून मुख्यमंत्र्यांच्या वाहनांचा ताफा  रतलामला जात होता. यावेळी डोसीगाव परिसरातील भारत पेट्रोलियमच्या शक्ती फ्युएल्स या पेट्रोल पंपावरून त्या गाड्यांमध्ये डिझेल भरण्यात आले. तिथून काही अंतर पुढे गेल्यानंतर या गाड्या बंद पडल्या.

पाणीमिश्रित डिझेलची माहिती मिळताच नायब तहसीलदार आशिष उपाध्याय, अन्न व पुरवठा अधिकारी आनंद गोरे आणि अन्य अधिकाऱ्यांनी पेट्रोल पंपाची तपासणी करून तो तात्काळ सील केला. 

रतलाममध्ये डॉ. मोहन यादव उद्योग, कौशल्य आणि रोजगार या विषयावरील एका कार्यक्रमाला उपस्थित राहिले. त्यांच्या ताफ्यातील गाड्यांबाबत जो प्रकार घडला, त्याचीच चर्चा मध्य प्रदेशमध्ये होती. 

वरिष्ठ अधिकाऱ्यांना अहवाल सादर करणार

पाणीमिश्रीत डिझेल भरल्याने १९ इनोव्हा गाड्या बंद पडल्याने  इंदूरहून गुरुवारी रात्रीच दुसऱ्या वाहनांची व्यवस्था मुख्यमंत्री ताफ्यासाठी करण्यात आली. त्यानंतर ही वाहने रतलामला रवाना झाली. डिझेलमध्ये पाणी कसे मिसळले गेले, याबाबतचा अहवाल सादर करण्यात येईल. त्यानंतरच योग्य ती कारवाई करण्यात येईल, असे उपाध्याय यांनी सांगितले.

पंपातील डिझेलच्या टाकीत पाणी झिरपले का?

तिथून मुख्यमंत्र्यांच्या ताफ्यातील गाड्यांपैकी १९ गाड्यांमध्ये १० ते २० लिटर डिझेल भरण्यात आले होते. याच पंपावरून एका ट्रकमध्ये २०० लिटर डिझेल भरले होते. तोही थोडे अंतर पुढे गेल्यानंतर बंद पडला. 

या प्रकारामुळे भारत पेट्रोलियमचे क्षेत्रीय व्यवस्थापक श्रीधर यांना बोलावण्यात आले. त्यांनीही तपासणी केली. सध्या पाऊस सुरू असून त्यामुळे पेट्रोल पंपातील डिझेलच्या टाकीत पाणी झिरपले असण्याची शक्यता त्यांनी व्यक्त केली.