US Israel Iran War : इराण-इस्रायल युद्धामुळे इंधन टंचाई भासणार? भारताकडे 'इतक्या' दिवसांचा तेल साठा; सरकारने दिली मोठी अपडेट

US Israel Iran War : केंद्रीय मंत्री म्हणाले की, सरकारने जुलै २०२१ मध्ये ओडिशा आणि कर्नाटकमध्ये एकूण ६५ लाख मेट्रिक टन साठवण क्षमतेच्या दोन अतिरिक्त व्यावसायिक-सह-सामरिक पेट्रोलियम साठा सुविधांच्या स्थापनेलाही मंजुरी दिली आहे.

 US Israel Iran War : मागील काही दिवसांपासून मध्य पूर्वेत युद्ध सुरू आहे. या युद्धाचा परिणाम जगावर जाणवत आहे, स्ट्रेट ऑफ होर्मुझ बंद झाल्यामुळे अनेक देशांना गॅस आणि क्रूड ऑईलचा तुटवडा जाणवर आहे. भारतातही गॅसचा तुटवडा जाणवण्यास सुरुवात झाली आहे, भारताचे तेल साठे सध्या दोन-तृतीयांश भरलेले असून, पुरवठ्याच्या संकटाच्या काळात ते अल्पकालीन आधार म्हणून काम करू शकतात, असे सरकारने सोमवारी राज्यसभेत सांगितले. भारत हा जगातील तिसरा सर्वात मोठा ऊर्जा ग्राहक असून, तो आपल्या कच्च्या तेलाच्या गरजेपैकी सुमारे ८८ टक्के आयात करतो. कच्च्या तेलासाठीच्या सामरिक भूमिगत साठवण सुविधा तीन ठिकाणी आहेत. आंध्र प्रदेशातील विशाखापट्टणम आणि कर्नाटकातील मंगळूर व पाडूर या ठिकाणी आहे, याची एकूण क्षमता ५३.३ लाख टन आहे.

घर बांधणे महागले! युद्धामुळे लोखंडी सळ्या अन् सिमेंटच्या किंमतीत मोठी वाढ

पेट्रोलियम आणि नैसर्गिक वायू राज्यमंत्री सुरेश गोपी यांनी राज्यसभेत एका प्रश्नाच्या लेखी उत्तरात सांगितले की, सरकारने इंडियन स्ट्रॅटेजिक पेट्रोलियम रिझर्व्ह्स लिमिटेड या विशेष उद्देश वाहनामार्फत, आंध्र प्रदेश आणि कर्नाटकमधील तीन ठिकाणी ५३.३ लाख मेट्रिक टन कच्चे तेल साठवण्यासाठी पेट्रोलियम साठे उभारले आहेत. अल्पकालीन पुरवठा संकटाच्या काळात हे साठे बफर म्हणून काम करू शकतात.

भारताकडे किती दिवसांचा तेलसाठा?

"बाजारातील परिस्थितीमुळे साठवलेल्या कच्च्या तेलाच्या प्रमाणात बदल होतो. सध्या, आयएसपीआरएलकडे अंदाजे ३३.७२ लाख मेट्रिक टन साठा आहे, हा एकूण साठवण क्षमतेच्या सुमारे ६४ टक्के आहे, अशी माहिती सुरेश गोपी  यांनी दिली.

गोपी म्हणाले की, सरकारने जुलै २०२१ मध्ये ओडिशा आणि कर्नाटक येथे एकूण ६५ लाख मेट्रिक टन साठवण क्षमतेच्या दोन अतिरिक्त व्यावसायिक-सह-सामरिक पेट्रोलियम साठा सुविधांच्या स्थापनेलाही मंजुरी दिली होती. सार्वजनिक क्षेत्रातील तेल आणि वायू उपक्रम कच्च्या तेलाच्या पुरवठ्याची सुरक्षा सुनिश्चित करण्यासाठी आणि कोणत्याही एका प्रदेशातील कच्च्या तेलावरील अवलंबित्वाचा धोका कमी करण्यासाठी, त्यांच्या तांत्रिक आणि व्यावसायिक गरजांनुसार विविध स्रोतांकडून कच्च्या तेलाची खरेदी करतात, असेही त्यांनी सांगितले.

४१ देशांकडून कच्चे तेल आयात करतात, यामध्ये इराक, सौदी अरेबिया, संयुक्त अरब अमिरात, कुवेत आणि कतार यांसारख्या पारंपरिक पुरवठादारांचा, तसेच अमेरिका, नायजेरिया, अंगोला, कॅनडा, कोलंबिया, ब्राझील आणि मेक्सिको यांसारख्या नवीन पुरवठादारांचा समावेश आहे.