सोनं, चांदी, रोख रक्कम नाही तर हुंड्यात मागितली किडनी, नकार दिला तेव्हा...

Dowry Case: गेल्या काही दिवसांपासून हुंडाबळीच्या बातम्या सातत्याने येत आहेत. अनेक प्रकरणांमध्ये दागदागिने, मालमत्ता, रोख रक्कम आदींच्या रूपात हुंडा मागितला जातो. मात्र बिहारमधील मुझफ्फरपूर येथे हुंड्याचं एक धक्कादायक प्रकरण समोर आलं आहे.

गेल्या काही दिवसांपासून हुंडाबळीच्या बातम्या सातत्याने येत आहेत. अनेक प्रकरणांमध्ये दागदागिने, मालमत्ता, रोख रक्कम आदींच्या रूपात हुंडा मागितला जातो. मात्र बिहारमधील मुझफ्फरपूर येथे हुंड्याचं एक धक्कादायक प्रकरण समोर आलं आहे. मुझफ्फरपूर शहरातील मिठनपूर पोलीस ठाण्याच्या हद्दीतील दिप्ती नावाच्या एका महिलेने पोलीस ठाण्यात धाव घेतली आणि सासरच्या मंडळींवर गंभीर आरोप केले. सासरच्या मंडळींनी मला माहेरहून हुंडा आणण्यास सांगितले. तसेच मी जेव्हा हुंडा आणू शकले नाही तेव्हा सासरच्या मंडळींनी पतीच्या उपचारांसाठी किडनी देण्याची मागणी केली. मी जेव्हा किडनी देण्यास मनाई केली तेव्हा मला मारहाण करण्यात आली. तसेच घरातून बाहेर काढण्यात आले, असा आरोपही या महिलेने केला.

दिप्ती हिने सांगितले की, माझं लग्न २०२१ मध्ये बोचहा पोलीस ठाण्याच्या हद्दीतील एका तरुणासोबत झालं होतं. लग्नानंतर सुरुवातीचे काही दिवस आनंदात गेले. मात्र काही महिन्यांनंतर सासरच्या मंडळींचं वर्तन बदलू लागलं. ते माहेरहून पैसे, दुचाकी आणण्यासाठी माझ्यावर सतत दबाव आणू लागले. तसेच मी कुठल्याच कामाची राहिलेली नाही, असे टोमणे मारू लागले.

यादरम्यान, लग्नाला दोन वर्षं झाल्यानंतर माझ्या पतीची एक किडनी खराब झाली असल्याचे मला समजले. त्यानंतर सासरच्या मंडळींनी तुला जर माहेरहून पैसे आणता येत नसतील तर तुझी एक किडनी तुझ्या पतीला दे, असे सांगून तगादा लावला. मात्र मी जेव्हा किडनी देण्यास नकार दिला तेव्हा त्यांनी मला घराबाहेर काढले.

दरम्यान, दिप्ती हिने माहेरी गेल्यानंतर महिला पोलीस ठाण्यात धाव घेत तक्कार नोंदवली. त्यानंतर पोलिसांनी दोन्ही पक्षांना बोलावून प्रकरण सामोपचाराने मिटवण्याचा प्रयत्न केला. मात्र तडजोड होऊ शकली नाही. दिप्ती हिला घटस्फोट हवा आहे. मात्र तिचा पती तिला घटस्फोट देण्यास तयार नाही, त्यामुळे  घटस्फोटावर दोघांचीही सहमती होऊ शकली नाही. त्यानंतर या महिलेने पोलीस ठाण्यात तक्रार दिली. तसेच पतीसह सासरच्या चार जणांवर आरोप करत त्यांना आरोपी बनवले. आता या प्रकरणी पोलीस पुढील तपास करत आहेत.