१५ वर्ष भारतीय सेनेत देशसेवा केली, केदारनाथ हेलिकॉप्टर दुर्घटनेत आला मृत्यू; कोण होते पायलट राजवीर सिंह?

अहमदाबादमधील भीषण विमान अपघाताची दुर्दैवी घटना ताजी असतानाच, केदारनाथजवळून हेलिकॉप्टर अपघाताची धक्कादायक बातमी समोर आली आहे. या अपघातात पायलटसह सात जणांचा मृत्यू झाला असून, मृतांमध्ये राजस्थानच्या जयपूर येथील माजी लष्करी अधिकारी राजवीर सिंह चौहान यांचा समावेश आहे. ते या हेलिकॉप्टरचे पायलट होते.

माजी लष्करी अधिकाऱ्याचा दुर्दैवी शेवट
मीडिया रिपोर्टनुसार, पायलट राजवीर सिंह चौहान हे भारतीय सैन्यातून निवृत्त झाले होते. त्यांनी तब्बल १५ वर्षे १० महिने देशाची सेवा केली आणि लेफ्टनंट कर्नल पदावरून ते निवृत्त झाले होते. सैन्यात असताना त्यांनी बराच काळ फ्लाइंग ऑपरेशन्स मॅनेजर म्हणून काम केले होते. ऑक्टोबर २०२४ पासून ते आर्यन एव्हिएशन प्रायव्हेट लिमिटेडमध्ये पायलट म्हणून कार्यरत होते.

रविवारी सकाळी, राजवीर सिंह चौहान यांचे बेल ४०७ हेलिकॉप्टर उत्तराखंडमधील गौरीकुंडजवळ अपघातग्रस्त झाले. या हेलिकॉप्टरमध्ये कॅप्टन चौहान यांच्यासह सहा भाविक होते. दुर्दैवाने, या अपघातात सर्वांचा मृत्यू झाला.

शोकाकुल प्रतिक्रिया आणि प्रशासकीय पाऊले
राजस्थानचे माजी मुख्यमंत्री अशोक गेहलोत यांनी या घटनेबद्दल तीव्र दुःख व्यक्त केले आहे. त्यांनी सोशल मीडियावर पोस्ट शेअर करत म्हटले की, "केदारनाथजवळ हेलिकॉप्टर अपघातात जयपूरचे रहिवासी पायलट राजवीर सिंह चौहानसह सात जणांचा मृत्यू होणे हे खूप दुःखद आहे. या कठीण काळात शोकग्रस्त कुटुंबांसोबत माझ्या मनःपूर्वक संवेदना आहेत."

दरम्यान, या अपघातानंतर उत्तराखंडचे मुख्यमंत्री पुष्कर सिंह धामी यांनी तातडीने उच्चस्तरीय बैठक बोलावली. त्यांनी पुढील दोन दिवस केदारनाथमध्ये हेलिकॉप्टर सेवा बंद ठेवण्याचे आदेश दिले आहेत. या अपघातासाठी जबाबदार असलेल्यांवर कठोर कारवाई करण्याची ग्वाहीही त्यांनी दिली आहे. या अपघातामुळे केदारनाथ यात्रेतील हेलिकॉप्टर सेवेच्या सुरक्षिततेवर पुन्हा एकदा प्रश्नचिन्ह निर्माण झाले आहे.