ऑपरेशन सिंदूर: मोदींनी अमेरिकेच्या न झालेल्या ५१ व्या राज्यात जाऊन सुनावले, ट्रम्प वठणीवर आले...

Donald Trump vs Narendra Modi: ट्रम्प यांनी आपणच भारत-पाकिस्तान युद्ध थांबविल्याचे दावे केले होते. व्यापारातील टेरिफ मुद्द्याने आपण भारताला नमते घ्यायला लावले असे ट्रम्प म्हणत होते. भारत वेळोवेळी ट्रम्प यांचे दावे खोडून काढत होता. परंतू, हे दावे कनिष्ठ पातळीवर खोडले जात होते.

ऑपरेशन सिंदूरपासून अमेरिकेचे राष्ट्राध्यक्ष डोनाल्ड ट्रम्प हे मीच युद्ध थांबविल्याचा दावा करत सुटले होते. जी - ७ देशांच्या बैठकीवेळी पंतप्रधान नरेंद्र मोदी यांनी ऑपरेशन सिंदूर अमेरिकेच्या मध्यस्थीमुळे किंवा व्यापार कराराच्या प्रस्तावामुळे नव्हे तर पाकिस्तानच्या विनंतीवरून तूर्त थांबविले आहे, असे सुनावले होते. यानंतर आता ट्रम्प वठणीवर आले आहेत. 

भारत आणि पाकिस्तानच्या दोन समजूतदार नेत्यांनी अणुयुद्धात रूपांतरित होऊ शकणाऱ्या युद्धाला रोखण्याचा निर्णय घेतला होता, असे ट्रम्प यांनी मान्य केले आहे. 

ट्रम्प यांनी आपणच भारत-पाकिस्तान युद्ध थांबविल्याचे दावे केले होते. व्यापारातील टेरिफ मुद्द्याने आपण भारताला नमते घ्यायला लावले असे ट्रम्प म्हणत होते. भारत वेळोवेळी ट्रम्प यांचे दावे खोडून काढत होता. परंतू, हे दावे कनिष्ठ पातळीवर खोडले जात होते. याचा हेकेखोर असलेल्या ट्रम्प यांच्यावर काहीही परिणाम होत नव्हता. आता मोदींनी कॅनडामधील जी ७ देशांच्या परिषदेतच जाऊन अमेरिकेला सुनावल्याने ट्रम्प यांना 'बरे झाले, सोनारानेच कान टोचले' या म्हणीची अनुभुती आली आहे. 

इराण आणि इस्रायलमधील संघर्षामुळे ट्रम्प जी७ शिखर परिषद अर्ध्यावरच सोडून वॉशिंग्टनला परतले होते. विशेष म्हणजे, पंतप्रधान नरेंद्र मोदींशी फोनवर झालेल्या संभाषणादरम्यान ट्रम्प यांनी त्यांना विचारले होते की, कॅनडाहून परतताना ते अमेरिकेत थांबू शकतात का? यावर मोदींनी नकार दिला होता. तसेच मोदींनी अमेरिकेच्या मध्यस्थीशिवाय दोन्ही सैन्यांमध्ये थेट संवाद झाला आणि त्यानंतर लष्करी हालचाली थांबवण्यात आल्या, असेही ट्रम्पना स्पष्ट केले होते.