पुन्हा एकदा निळ्या ड्रममध्ये सापडला मृतदेह, दोरीने बांधलेले होते पाय आणि गळा

Punjab Crime News: काही महिन्यांपूर्वी मेरठमध्ये निळ्या ड्रममध्ये लपवलेला मृतदेह सापडल्याने खळबळ उडाली होती. या प्रकरणात पत्नीने तिच्या प्रियकरासोबत मिळून पतीची हत्या करून तो मृतदेह निळ्या ड्रममध्ये लपवल्याचे समोर आले होते. दरम्यान, आता पुन्हा एकदा निळ्या ड्रममध्ये मृतदेह सापडल्याने खळबळ उडाली आहे. 

काही महिन्यांपूर्वी मेरठमध्ये निळ्या ड्रममध्ये लपवलेला मृतदेह सापडल्याने खळबळ उडाली होती. या प्रकरणात पत्नीने तिच्या प्रियकरासोबत मिळून पतीची हत्या करून तो मृतदेह निळ्या ड्रममध्ये लपवल्याचे समोर आले होते. दरम्यान, आता पुन्हा एकदा निळ्या ड्रममध्ये मृतदेह सापडल्याने खळबळ उडाली आहे. पंजाबमधील लुधियाना येथे एका निळ्या ड्रममध्ये लपवलेल्या स्थितीत हा मृतदेह सापडला आहे.

येथील शेरपूर परिसरामध्ये एका ड्रममधून दुर्गंध येत असल्याची माहिती स्थानिकांनी पोलिसांना दिली होती. त्यानंतर पोलिसांनी घटनास्थळी धाव घेत तपासणी केला असता त्या निळ्या रंगाच्या ड्रममध्ये हा मृतदेह सापडला. हा मृतदेह एका प्लॅस्टिकच्या पिशवीत भरून ड्रममध्ये ठेवण्यात आला होता. तसेच या मृतदेहाचे पाय आणि गळा दोरीने बांधलेला होता.

याबाबत अधिक माहिती देताना पोलीस अधिकारी कुलवंत कौर यांनी सांगितले की, मृतदेहाच्या चेहऱ्यावरून तो एखादा प्रवासी असण्याची शक्यता आहे. हा मृतदेह पोस्टमार्टेमसाठी सिव्हिल रुग्णालयाच्या शवागारात पाठवण्यात आला आहे. मृतदेहाच्या शरीराव अन्य कुठल्याही खाणाखुणा दिसून आलेल्या नाहीत. मात्र मृतदेह कुजलेल्या स्थितीत होता. त्यामुळे त्याचा मृत्यू होऊन काही दिवस उलटले असावेत, अशी शक्यता आहे.

दरम्यान, हा मृतदेह लपवून ठेवण्यासाठी वापरलेला ड्रम हा अगदी नवा असल्याचे पोलिसांना प्राथमिक तपासामध्ये दिसून आले आहे. त्यामुळे ही हत्या अत्यंत नियोजनबद्धरीत्या करण्यात आली असावी, तसेच मृतदेह लपवण्यासाठी नवा ड्रम खरेदी करण्यात आला असावा, असा पोलिसांचा अंदाज आहेत. त्यामुळे या ड्रमच्या माध्यमातून आरोपींचा माग काढण्यासाठी पोलिसांनी लुधियानामधील ड्रम तयार करणाऱ्या ४२ कंपन्यांची यादी तयार केली असून, त्यांच्याकडे चौकशी सुरू आहे.

तसेच घटनास्थळापासून पाच किमी परिसरामध्ये असलेल्या सीसीटीव्ही कॅमेऱ्यांमधील चित्रिकरणाची पडताळणीही पोलिसांकडून केली जात आहे. त्याबरोबरच रेल्वे स्टेशन, बस स्टँड आणि शहरातील अन्य काही भागातील सीसीटीव्ही कॅमेऱ्यांची पडताळणी करून संशयास्पद हालचालींचा मागोवा घेतला जात आहे.