आता गोदामातून सिलेंडर विक्री बंद, नियम मोडणाऱ्यांवर कारवाई होणार; दिल्ली सरकारचा निर्णय

गोदामांमधून होणारी सिलेंडर विक्री राजधानी दिल्लीत थांबवण्यात आली आहे. दिल्ली सरकारने रविवारी हा निर्णय घेतला आहे.

एलपीजी सिलेंडर वितरण सुरळीत सुरू रहावे यासाठी दिल्ली सरकारने गोदामांमधून होणारी सिलेंडर विक्री बंद केली आहे. दिल्लीमुख्यमंत्री कार्यालयाकडून याबद्दलची माहिती देण्यात आली. सर्व सिलेंडर वितरकांना आदेश देण्यात आले आहेत की, अशा प्रकारे सिलेंडर विक्री बेकायदेशीर असेल आणि असे आढळून आले तर कारवाई केली जाईल. 

दिल्लीच्या मुख्यमंत्री कार्यालयाकडून या निर्णयाबद्दल सांगण्यात आले की, एलजीपीची वितरण व्यवस्था पारदर्शक आणि सुरळीत राहावी यासाठी गोडाऊनमधून होणारी सिलेंडरची विक्री बंद केली आहे. त्यामुळे यापुढे गोदामांमधून सिलेंडर मिळणार नाही. 

नागरिकांना त्रास होऊ नये म्हणून ५ किलो वजनाच्या सिलेंडरची संख्या वाढवण्यात आली आहे. आता ओळखपत्र दाखवून हे छोटे सिलेंडर सहजपणे नागरिक घेऊ शकणार आहेत. त्यासाठी कोणत्याही पडताळणीची गरज पडणार नाही. 

विशेषतः स्थलांतरित मजुरांच्या मदतीसाठी एचपीसीएलच्या निवडक विक्री केंद्रांवर ११ मदत कक्ष सुरू करण्यात आले आहेत. तिथे एलपीजी वितरकांची माहिती दिली जात आहे. लोकांना आवाहन केले जात आहे की, त्यांनी कोणत्याही अफवांवर विश्वास ठेवू नये.