भयंकर! पंजाबमधील फटाक्याच्या कारखान्यात भीषण स्फोट; ५ जणांचा मृत्यू, अनेक जण जखमी

पंजाबमधील मुक्तसर जिल्ह्यातील सिंघेवाला गावात गुरुवारी रात्री १:३० वाजता फटाक्याच्या कारखान्यात भीषण स्फोट झाला. यामध्ये आतापर्यंत पाच जणांचा मृत्यू  झाला आहे, तर अनेक जण ढिगाऱ्याखाली दबले आहेत. घटनेच्या वेळी कारखान्यात सुमारे ४० कामगार काम करत होते. एका कामगाराने दिलेल्यानुसार, रात्री झोपेत असताना कारखान्यात आग लागल्याने एकच गोंधळ उडाला काहीही समजण्यापूर्वीच मोठा स्फोट झाला. १५ कामगार कसेबसे बाहेर पडण्यात यशस्वी झाले, तर २५ जण ढिगाऱ्याखाली दबले गेले.

डीएसपी जसपाल सिंह यांनी दिलेल्या माहितीनुसार, या दुर्घटनेत पाच जणांचा मृत्यू झाला आहे. अनेक जण जखमी झाले आहेत. जखमींना भटिंडा एम्समध्ये दाखल करण्यात आले आहे, जिथे त्यांच्यावर उपचार सुरू आहेत. घटनेनंतर पोलीस, अग्निशमन दल आणि मदत पथके घटनास्थळी पोहोचली. ढिगाऱ्याखाली दबलेल्या लोकांना बाहेर काढण्याचे काम सुरू आहे. 

STORY | 5 killed, several injured in firecracker factory blast in Punjab's Sri Muktsar Sahib

READ: https://t.co/05zLd51bJPpic.twitter.com/v2ZB6Vumc6

— Press Trust of India (@PTI_News) May 30, 2025

घटनास्थळी मोठ्या संख्येने स्थानिक लोकही मदत करत आहेत. स्फोटाची नेमकी कारणं अद्याप समजू शकलेली नाहीत. प्रशासनाने या घटनेच्या चौकशीचे आदेश दिले आहेत. जर सुरक्षिततेच्या निकषांकडे दुर्लक्ष केलं गेलं असेल तर कारखाना मालक आणि जबाबदार अधिकाऱ्यांवर कठोर कारवाई केली जाईल, असं पोलिसांनी म्हटलं आहे.

फटाक्याच्या कारखान्यात झालेल्या मोठ्या स्फोटाबाबत नवीन खुलासा समोर आला आहे. या कारखान्यात फटाके बनवण्याचे काम उत्तर प्रदेशातील हाथरस येथील रहिवासी कंत्राटदार राज कुमार याने घेतल्याचं सांगितलं जात आहे. या घटनेनंतर कंत्राटदार फरार आहे, पोलीस त्याचा शोध घेत आहेत.