हनिमूनला गेलेलं कपल अजूनही बेपत्ता; ड्रोनच्या मदतीने घेतला जातोय शोध; काय आहे हे प्रकरण?

सोहरा भागात अचानक बेपत्ता झालेल्या इंदूर येथील नवविवाहित कपलचा शोध घेण्यासाठी  ड्रोन आणि स्निफर डॉग तैनात केले आहेत.

मेघालय पोलिसांनी पूर्व खासी हिल्स जिल्ह्यातील सोहरा भागात अचानक बेपत्ता झालेल्या इंदूर येथील नवविवाहित कपलचा शोध घेण्यासाठी  ड्रोन आणि स्निफर डॉग तैनात केले आहेत. मुख्यमंत्री कॉनराड के. संगमा यांनी मंगळवारी रात्री मध्य प्रदेशचे मुख्यमंत्री मोहन यादव यांच्याशी चर्चा करून सर्वतोपरी मदत करण्याचं आश्वासन दिलं आहे.

मेघालय गृह विभागाच्या एका वरिष्ठ अधिकाऱ्याने दिलेल्या माहितीनुसार, रविवारी संध्याकाळपासून बेपत्ता कपलचा शोध घेण्यासाठी ड्रोन आणि विशेष के9 डॉग स्क्वॉड तैनात करण्यात आले आहेत. कपल ज्या लिव्हिंग रूट ब्रिजवर एक रात्र राहिले होते, तिथे शोध घेण्यासाठी तीन शोध पथकांना मदत करण्यासाठी ड्रोन आणि के9 युनिट्स तैनात करण्यात आले आहेत.

पोलिसांच्या माहितीनुसार, राजा रघुवंशी आणि त्यांची पत्नी सोनम २२ मे रोजी मावलाखियात गावात पोहोचले आणि सोहरा पोलीस ठाण्याअंतर्गत येणाऱ्या नोंगरियात गावातील लिव्हिंग रूट ब्रिज पाहण्यासाठी स्कूटर भाड्याने घेतली. या कपलने एका होमस्टेमध्ये एक रात्र घालवली आणि दुसऱ्या दिवशी मावलाखियात परतण्यासाठी चेक-आऊट केलं.

२४ मे रोजी शिलाँग-सोहरा रस्त्यावरील एका कॅफेजवळ त्यांची स्कूटर बेवारस अवस्थेत आढळली, त्यानंतर स्थानिक ग्रामस्थांच्या मदतीने शोध मोहीम सुरू करण्यात आली असं मेघालय पोलीस अधिकाऱ्यांनी एका वृत्तसंस्थेला सांगितलं. आतापर्यंत कपलबाबत कोणतीही माहिती मिळालेली नाही आणि त्यांचा फोन देखील बंद आहे असं शोध आणि बचाव मोहिमेत सहभागी असलेल्या एका वरिष्ठ पोलिस अधिकाऱ्याने सांगितलं.

"संगमा यांनी मध्य प्रदेशच्या मुख्यमंत्र्यांशी बोलून बेपत्ता कपलला शोधण्यासाठी मेघालय पोलीस आणि सर्व संबंधित पक्षांकडून सर्वतोपरी मदत करण्याचे आश्वासन दिले" अशी माहिती मुख्यमंत्र्यांच्या जवळच्या व्यक्तीने दिली आहे. सकाळी ९ वाजल्यापासून सूर्यास्तापर्यंत नोंगरियात, मावसाहेव आणि वैसाडोंग भागात तीन पथकं तैनात करण्यात आली आहेत. शिलाँग-सोहरा रस्त्यावरील खोऱ्यांमध्ये शोध मोहीम सुरू असल्याचं पोलिसांनी सांगितलं.