गुजरातमध्ये भीषण अपघात! वलसाडमध्ये कार-ट्रकच्या धडकेत एकाच कुटुंबातील ७ जणांचा मृत्यू; कुंभघाट परिसरात शोककळा

गुजरातमध्ये झालेल्या भीषण अपघातात सात जणांचा दुर्दैवी मृत्यू झाला.

Gujarat Accident:गुजरातच्या वलसाड जिल्ह्यातील कपराडा तालुक्यात शुक्रवारी क्षणार्धात एका हसत्या-खेळत्या कुटुंबाचा अंत झाला. कुंभ घाटातील एका धोकादायक वळणावर भरधाव ईको कार आणि ट्रकची समोरासमोर जोरदार धडक झाली. या भीषण अपघातात एकाच कुटुंबातील ५ जणांसह एकूण ७ प्रवाशांचा मृत्यू झाला आहे. या घटनेने संपूर्ण कपराडा परिसरात खळबळ उडाली असून अंबा जंगल गावावर शोककळा पसरली आहे.

भीषण धडक आणि कारचा चक्काचूर

मिळालेल्या माहितीनुसार, कपराडा येथील अंबा जंगल गावात राहणारे हे कुटुंब ईको कारने प्रवास करत होते. कार कुंभ घाटातील वळणावर आली असताना समोरून येणाऱ्या एका वेगवान ट्रकने कारला जोरदार धडक दिली. हा अपघात इतका भीषण होता की, ईको कारचा अक्षरशः पत्र्यासारखा चक्काचूर झाला. धडकेचा आवाज इतका मोठा होता की, आसपासच्या नागरिकांनी तातडीने घटनास्थळाकडे धाव घेतली.

घटनास्थळी रक्ताचा सडा; मृत्यूचा आकडा वाढला

अपघातानंतरचे दृश्य अत्यंत भयावह होते. कारमधील ५ सदस्यांचा जागीच मृत्यू झाला होता, तर २ जण रक्ताच्या थारोळ्यात गंभीर जखमी अवस्थेत पडले होते. स्थानिक नागरिक आणि १०८ रुग्णवाहिकेच्या मदतीने जखमींना तात्काळ रुग्णालयात नेण्यात आले. मात्र, नशिबाने त्यांची साथ दिली नाही. उपचार सुरू असतानाच त्या दोघांचीही प्राणज्योत मालवली. या अपघातातील मृतांची संख्या ७ वर पोहोचली आहे.

मदतीसाठी धावले हात

अपघाताची माहिती मिळताच पोलिसांनी घटनास्थळी धाव घेत बचावकार्य सुरू केले. स्थानिक लोकांनी कारमध्ये अडकलेल्या प्रवाशांना बाहेर काढण्यासाठी पोलिसांना मोठी मदत केली. मृतदेहांची अवस्था पाहून उपस्थितांच्या डोळ्यांतही पाणी आले. पोलिसांनी मृतांचे देह शवविच्छेदनासाठी पाठवले असून अपघाताचा गुन्हा दाखल केला आहे.

रस्ते सुरक्षेचा प्रश्न पुन्हा ऐरणीवर

कुंभ घाट परिसर हा त्याच्या अवघड वळणांसाठी ओळखला जातो. या अपघाताने क्षेत्रात रस्ते सुरक्षेचा मुद्दा पुन्हा एकदा ऐरणीवर आणला आहे. भरधाव वेग आणि वळणावरील अंदाज चुकल्याने हा भीषण अपघात झाल्याचा प्राथमिक अंदाज व्यक्त केला जात आहे.