मानवतेला काळीमा फासणारी घटना; वृद्धला बाइकला बांधून फरफटत नेले, प्रकृती गंभीर

रस्त्यावर फरफटल्यामुळे शरीरावरील त्वचा सोलली जाऊन गंभीर जखमा झाल्या.

MP Crime: मध्य प्रदेशातील रीवा जिल्ह्यातून मन सुन्न करणारी घटना समोर आली आहे. तीन तरुणांनी एका वृद्धावर अत्यंत अमानुषपणे हल्ला करून त्यांना मारहाण केली, शिवाय बाइकला बांधून रस्त्यावरून अनेक किलोमीटर फरफटत नेले. रक्तबंबाळ अवस्थेत असलेले वृद्ध सध्या रुग्णालयात जीवन-मरणाची झुंज देत आहेत. या घटनेच्या निषेधार्थ संतप्त नातेवाईक आणि ग्रामस्थांनी रस्ता रोखून धरल्याने परिसरात तणावाचे वातावरण निर्माण झाले.

काय आहे संपूर्ण घटना?

रीवा जिल्ह्यातील समेरिया पोलीस स्टेशन हद्दीत राहणारे लक्ष्मण प्रजापती हे या क्रूर घटनेचे बळी ठरले. पोलिसांच्या माहितीनुसार, किरकोळ वादातून बाइकवरून आलेल्या तीन तरुणांनी लक्ष्मण यांना अडवले. आधी त्यांना निर्दयपणे मारहाण केली आणि नंतर बाईकला बांधून रस्त्यावरून फरफटत नेले.

शरीर अक्षरशः सोलले गेले; प्रकृती गंभीर

रस्त्यावर फरफटल्यामुळे शरीरावरील त्वचा सोलली जाऊन मांस बाहेर येईल इतक्या गंभीर जखमा झाल्या आहेत. स्थानिक नागरिकांनी त्यांना तातडीने रीव्यातील संजय गांधी रुग्णालयात दाखल केले. डॉक्टरांनी त्यांची प्रकृती अत्यंत नाजूक असल्याचे सांगितले आहे.

संतप्त नागरिकांचा चक्काजाम

या अमानुषतेच्या निषेधार्थ नातेवाईक आणि ग्रामस्थांचा संताप अनावर झाला. त्यांनी सेमरिया-रीवा मार्गावर अनेक तास चक्काजाम केला. घटनेची माहिती मिळताच पोलिसांनी घटनास्थळी धाव घेतली आणि बरीच मेहनत घेऊन मार्ग मोकळा केला.

आरोपींची ओळख पटली; अटकेसाठी पथके रवाना

पोलिसांनी सांगितले की, आरोपींची ओळख पटली असून त्यांना अटक करण्यासाठी विशेष पथके रवाना करण्यात आली आहेत. लवकरच आरोपी ताब्यात घेतले जातील, असा विश्वास पोलिसांनी व्यक्त केला आहे.