प्रजासत्ताक दिनाचे प्रमुख पाहुणे उर्सुला वॉन डेर लेयेन आणि अँटोनियो कोस्टा कोण आहेत?

India Republic Day 2026 Chief Guest Ursula Von Der Leyen and Antonio Costa: कर्तव्य पथावरील परेडमध्ये या दोन्ही जागतिक नेत्यांची उपस्थिती भारताच्या वाढत्या आंतरराष्ट्रीय महत्त्वाचे प्रतीक मानली जात आहे.

India Republic Day 2026 Chief Guest Ursula Von Der Leyen and Antonio Costa: आज कर्तव्य पथावर साजऱ्या होत असलेल्या भारताच्या ७७ व्या प्रजासत्ताक दिनाच्या सोहळ्यात युरोपियन युनियन (EU) चे दोन प्रमुख नेते मुख्य अतिथी म्हणून उपस्थित राहिले. यात युरोपियन कमिशनच्या अध्यक्षा उर्सुला वॉन डेर लेयेन आणि युरोपियन कौन्सिलचे अध्यक्ष अँटोनियो कोस्टा यांचा समावेश आहे. त्यांच्या या ऐतिहासिक भेटीदरम्यान भारत आणि युरोपियन युनियनमध्ये एक मोठा व्यापार करार (Mother of all deals) होणार असल्याचे सांगितले जात आहे.

कोण आहेत उर्सुला वॉन डेर लेयेन (Ursula von der Leyen)?

उर्सुला वॉन डेर लेयेन या युरोपियन कमिशनच्या पहिल्या महिला अध्यक्षा आहेत. त्या २०१९ पासून कार्यरत आहेत. त्या मूळच्या जर्मनीच्या असून व्यवसायाने स्त्रीरोगतज्ज्ञ (Gynecologist) आहेत. त्यांनी लंडन स्कूल ऑफ इकॉनॉमिक्समधून अर्थशास्त्राचे शिक्षण घेतले आणि नंतर वैद्यकीय क्षेत्रात पदवी मिळवली. त्या जर्मनीच्या मंत्रिमंडळात संरक्षण मंत्री म्हणूनही कार्यरत होत्या. EU मधील त्यांचा कार्यकाळ २०२९ पर्यंत आहे.

कोण आहेत अँटोनियो कोस्टा (Antonio Costa)?

अँटोनियो कोस्टा युरोपियन कौन्सिलचे अध्यक्ष आहेत. डिसेंबर २०२४ मध्ये त्यांची या पदावर नियुक्ती झाली. ६४ वर्षीय कोस्टा यांचे पूर्वज गोव्याचे आहेत. पोर्तुगालचे पंतप्रधान असताना त्यांनी भारताशी अत्यंत जिव्हाळ्याचे संबंध प्रस्थापित केले होते. ते पोर्तुगालचे माजी पंतप्रधान आहेत. युरोपियन कौन्सिलचे अध्यक्ष पद भूषवणारे ते अल्पसंख्याक समुदायाचे पहिले नेते आहेत. त्यांना एक कुशल वार्ताकार मानले जाते.

या दोघांच्या भारत भेटीचे महत्त्व

हे दोन्ही नेते २५ ते २७ जानेवारी दरम्यान भारत दौऱ्यावर आहेत. या काळात भारत आणि युरोपियन युनियन दरम्यान महत्त्वाच्या द्विपक्षीय व्यापार करारावर स्वाक्षरी होण्याची दाट शक्यता आहे. यामुळे भारत आणि युरोपमधील आर्थिक आणि धोरणात्मक संबंधांना नवी दिशा मिळेल. कर्तव्य पथावरील परेडमध्ये या दोन्ही जागतिक नेत्यांची उपस्थिती भारताच्या वाढत्या आंतरराष्ट्रीय महत्त्वाचे प्रतीक मानली जात आहे.