रेडिरेकनरनुसार मिळकत कराचे सुधारित मूल्य द्या महापौरांचे आदेश: समितीची झाली पहिली बैठक

सोलापूर :
रेडिरेकनरनुसार (शासकीय मूल्यांकन तक्ता) शहरातील सुधारित मिळकत कराच्या आकडेवारीचा अहवाल १0 ऑगस्टपर्यंत सादर करा, असे आदेश महापौर सुशीला आबुटे यांनी कर संकलन विभागाला दिले.
मिळकतीचे फेरमूल्यांकन करण्यासंदर्भात नियुक्त करण्यात आलेल्या समितीची बैठक महापौर आबुटे यांच्या अध्यक्षतेखाली मंगळवारी घेण्यात आली. बैठकीला समितीचे अध्यक्ष तथा सभागृहनेते संजय हेमगड्डी, विरोधी पक्षनेते कृष्णाहरी दुस्सा, दिलीप कोल्हे, भीमाशंकर म्हेत्रे, आनंद चंदनशिवे, शिवलिंग कांबळे, आरिफ शेख, सहायक आयुक्त अमिता दगडे—पाटील, श्रीकांत मायकलवार, प्रदीप साठे, कर संकलन प्रमुख चंद्रभागा बिराजदार, संगणक विभाग प्रमुख सचिन कांबळे आदी उपस्थित होते. जीआयएस प्रणालीच्या (भौगोलिक माहिती तंत्रज्ञान) सर्वेक्षणानुसार शहरात साडेतीन लाख मिळकती असल्याचे दिसून आले आहे. या सर्वेक्षणावरून मिळकतीची कॅटेगिरी करून कर कशापद्धतीने लावायचा याचे शहरी गावठाण, मध्यम भाग आणि हद्दवाढ असे तीन भाग करून एक मॉडेल अहवाल तयार करून समितीपुढे सादर करावा, असे आदेश आबुटे यांनी दिले. चंदनशिवे, शेख यांनी झोपडप˜ीत राहणार्‍यांना कर वाढीतून दिलासा द्यावा, अशी सूचना केली.
सोलापुरातील मिळकत कराचे १२ वर्षांपासून रिव्हिजन झालेले नाही. महापालिकेच्या रेकॉर्डवर २ लाख ३९ हजार मिळकती आहेत. इतक्याच मिळकतीकडून कर वसूल केला जातो. आणखी १ लाख मिळकती शोधल्या तर १00 कोटींचा महसूल वाढणार आहे. स्मार्ट सिटी योजनेसाठी हा निधी उपयोगी पडणार आहे. तत्कालीन आयुक्त चंद्रकांत गुडेवार यांनी फेब्रुवारी २0१५ मध्ये मिळकत करवाढीचा विषय सभेकडे पाठविला होता. मिळकतीचे ठिकाण, वय आणि किमतीवरून मोठी वाढ सुचविण्यात आली होती. याला नागरिकांचा विरोध होईल म्हणून सभागृहाने यावर चर्चा करून निर्णय घेण्यासाठी हेमगड्डी यांच्या अध्यक्षतेखाली समिती नियुक्त केली आहे. या समितीची आज पहिलीच बैठक झाली.