हनिमून ते राजाची हत्या...; मेघालय पोलिसांनी विचारलेल्या 'या' १३ प्रश्नांनी उडवली सोनमची झोप!

इंदूरच्या गाजलेल्या राजा रघुवंशी हत्याकांडात मुख्य आरोपी असलेल्या सोनम रघुवंशीला अटक करण्यात आली असून, तिच्यासोबत तिचा प्रियकर राज कुशवाहा आणि तीन कॉन्ट्रॅक्ट किलर्सही पोलिसांच्या ताब्यात आहेत. मेघालय पोलिसांनी या गुन्ह्याचा तपास अधिक खोलात घेत सोनमची कसून चौकशी केली असून, तिच्यासमोर थेट आणि गंभीर स्वरूपाचे १३ प्रश्न ठेवण्यात आले.

सोनमकडून ‘हनिमून ते हत्या’ दरम्यानची सत्य परिस्थिती उघड करण्याचा प्रयत्न!
मेघालय पोलिसांनी सोनमला विचारले की, तिचा पती राजा रघुवंशीसोबत तिचा झालेला विवाह तिच्यासाठी आनंददायी नव्हता का? तिचा प्रियकर राज कुशवाहा तिच्या आयुष्यात आधीपासून होता का? आणि सर्वात महत्वाचं म्हणजे की, राजाची हत्या करण्यामागे नेमकं तिचं उद्दिष्ट काय होतं?

पोलिसांनी सोनमला विचारलेले प्रमुख प्रश्न:
१. तुम्ही आणि राजा मेघालयला हनिमूनसाठी केव्हा प्लॅन केलं होतं?

२. परतीचं तिकीट का बुक केलं नव्हतं? हा भाग आधीपासूनच योजनेत होता का?

३. राज कुशवाहाशी तुमचं पूर्वीपासून नातं होतं का? कारण पुराव्यांनुसार तुमचा सातत्यानं संपर्क होता.

४. एन्क्रिप्टेड चॅट्सवरून असं दिसतं की, हनिमूनदरम्यानही तुम्ही राजसोबत सतत संवाद साधत होतात, तुमच्यात काय बोलणं सुरू होतं?

५. तुमचं लोकेशन आरोपींसोबत सतत का शेअर होत होतं?

६. २३ मे रोजी मावलाखियात तुम्हाला राजा आणि तीन हिंदी भाषिक पुरुषांसोबत पाहण्यात आलं, ते लोक कोण होते?

७. स्थानिक गाईड अल्बर्ट पीडी यांची सेवा का नाकारली आणि दुसऱ्या दिवशीही टाळत राहिलात?

८ . अल्बर्टने ओळखलेले तीन पुरुष नंतर हत्येत सामील असल्याचं उघड झालं – या लोकांना तुम्ही ओळखत होता का?

९. राजाच्या स्मार्टवॉच आणि फोनवरून आरोपींच्या लोकेशनशी जुळणारे पुरावे मिळाले आहेत. मात्र, राजाचे सोने आणि इतर मौल्यवान वस्तू गायब आहेत, पण तुमचे दागिने शाबूत आहेत. याचं स्पष्टीकरण काय?

१०. राजाच्या आईच्या म्हणण्यानुसार, तो मेघालयला जाण्यास इच्छुक नव्हता – तुम्ही त्याच्यावर दबाव आणला का?

११. लग्नाच्या विधी दरम्यान तुम्ही नाराज दिसत होता, मग हे लग्न का केलं?

१२. राज कुशवाहासोबत मिळून हत्या करण्याचा कट रचल्याचे पुरावे मिळाले आहेत – यावर तुमचं उत्तर काय?

१३. तुम्ही स्वतः राजाला मारण्यासाठी या लोकांशी संगनमत केलं का?

११ मे रोजी लग्न, २ जून रोजी मृत्यू!
सोनम आणि राजा यांचे लग्न ११ मे रोजी पार पडले होते. त्यानंतर दोघंही हनिमूनसाठी शिलाँगला गेले. मात्र २ जून रोजी, राजाचा मृतदेह एका दरीजवळील खड्ड्यात सापडला. त्यानंतर सोनमने मेघालय सोडून इंदूर गाठलं आणि तिथे भाड्याच्या घरात वास्तव्य केलं. काही काळाने ती गाझीपूरकडे रवाना झाली, जिथे तिला पोलिसांनी ताब्यात घेतलं.