मुलाचा मृत्यू झाल्यावर वडिलांनी मृतदेहासोबत पुरली बाईक; मन हेलावून टाकणारी घटना

१८ वर्षीय क्रिश परमारचा रस्ते अपघातात मृत्यू झाला. त्यानंतर कुटुंबाने असं काही केलं जे पाहून सर्वजण भावुक झाले.

गुजरातमधील नाडियाद येथील उत्तरसांडा गावात एक हृदयद्रावक घटना उघडकीस आली आहे. १८ वर्षीय क्रिश परमारचा अपघातात मृत्यू झाला. त्यानंतर कुटुंबाने असं काही केलं जे पाहून सर्वजण भावुक झाले. मुलाच्या मृत्यूनंतर कुटुंबाने एक अनोखा आणि भावनिक निर्णय घेतला. क्रिशला त्याच्या सर्वात प्रिय वस्तूसह म्हणजेच त्याच्या बाईकसह पुरण्यात आलं. हे दृश्य पाहून तिथे उपस्थित असलेल्या सर्वांच्या डोळ्यांत पाणी आलं.

२६ मे रोजी संजयभाई सुलेमानभाई परमार यांचा एकुलता एक मुलगा क्रिश परमार बीसीएसाठी रजिस्ट्रेशन करण्यासाठी एका कॉलेजमध्ये गेला होता. रात्री ८ वाजता परत येत असताना त्याची बाईक ट्रॅक्टर-ट्रॉलीला धडकली. टक्कर इतकी जोरदार होती की, क्रिशच्या डोक्याला आणि शरीराला गंभीर दुखापत झाली. त्याला ताबडतोब लांबवेल रोडवरील मल्टीस्पेशालिटी हॉस्पिटलमध्ये नेण्यात आलं, जिथे १२ दिवस जीवन आणि मृत्यूशी झुंज दिल्यानंतर शनिवारी सकाळी त्याचा मृत्यू झाला. याने कुटुंबाला धक्का बसला.

क्रिशला त्याची बाईक खूप आवडायची. त्याचे वडील संजयभाई म्हणाले की, "क्रिशला बाईकची खूप आवड होती. आमच्याकडे कार होती, पण तो नेहमीच बाईकने प्रवास करायचा." कुटुंबाने ठरवलं की क्रिशच्या आवडत्या गोष्टी, त्याचे कपडे, बूट, चष्मा आणि बाईक त्याच्यासोबत पुरायला पाहिजेत, जेणेकरून त्याच्या आत्म्याला शांती मिळेल. 

अंत्यसंस्कारादरम्यान, क्रिशची बाईक पुरण्यात आली जे पाहून गावकरी आणि नातेवाईकही भावूक झाले. क्रिशने नुकतीच १२वीची परीक्षा दिली होती आणि तो पुढील शिक्षणाची तयारी करत होता. त्याच्या मृत्यूने कुटुंबावर दुःखाचा डोंगर कोसळला. गावात शोकाचं वातावरण आहे.