डबल लॉटरी...! आपने पंजाब पोटनिवडणूक जिंकली अन् राज्यसभेची एक जागा रिक्त झाली

AAP Punjab By Election win: लुधियानाची ही पोटनिवडणूक ही येत्या विधानसभेची आणि आपसाठी लिटमस टेस्ट मानली जात होती.

दिल्लीतील दारुण पराभवानंतर आपसाठी आजचा दिवस सर्वात चांगला ठरला आहे. चार राज्यांत झालेल्या पाच जागांवरील पोटनिवडणुकीत दोन आपने जिंकल्या आहेत. गुजरातमध्ये आपने भाजपच्या उमेदवाराला हरविले आहे, तर पंजाबमध्ये एक जागा जिंकत एका बड्या नेत्यासाठी राज्यसभेची वाट मोकळी केली आहे.   

लुधियाना पश्चिम विधानसभा जागेसाठी १९ जून रोजी पोटनिवडणूक झाली. आपचे आमदार गुरप्रीत गोगी बस्सी यांचे जानेवारीमध्ये निधन झाले होते. त्यानंतर ही जागा रिक्त होती. पक्षाने राज्यसभा खासदार संजीव अरोरा यांना उमेदवारी दिली होती. अरोरा यांनी पहिल्या फेरीपासून शेवटच्या फेरीपर्यंत आघाडी कायम ठेवली आणि ही जागा जिंकली. यामुळे राज्यसभेची जागा रिक्त झाली आहे. 

काँग्रेसचे भारत भूषण आशु दुसऱ्या क्रमांकाची मते मिळाली तर भाजपाच्या जीवन गुप्ता यांना तिसऱ्या क्रमांकावर रहावे लागले. लुधियानाची ही पोटनिवडणूक ही येत्या विधानसभेची आणि आपसाठी लिटमस टेस्ट मानली जात होती. कारण या निवडणुकीत अब्जाधीश असलेल्या अरोरा यांना उतरविण्यात आले होते, तसेच त्यांच्या जागी अरविंद केजरीवाल किंवा मनिष सिसोदिया यांना राज्यसभेवर पाठविण्याचा आपचा प्लॅन होता. 

अरोरा हे हरले असते तर दिल्लीनंतर पंजाबमध्ये आपविरोधी संदेश गेला असता. तसेच राज्यसभेची जागाही रिक्त झाली नसती. यामुळे केजरीवाल किंवा सिसोदिया या बड्या नेत्यांपैकी एकालाही राज्यसभेवर जाता आले नसते. आपचे प्रमुख अरविंद केजरीवाल, पंजाबचे प्रभारी मनीष सिसोदिया आणि मुख्यमंत्री भगवंत मान यांनी या जागेसाठी ताकद पणाला लावली होती. या एका जागेमुळे आपचे राज्यसभेचे मार्ग खुले झाले आहेत.