डोनाल्ड ट्रम्प यांची 5000 KM दूर असलेल्या देशावर हल्ल्याची तयारी, केव्हाही होऊ शकतो हल्ला? एअरस्पेस बंदची घोषणा
By ऑनलाइन लोकमत | Updated: November 29, 2025 22:38 IST2025-11-29T22:37:45+5:302025-11-29T22:38:28+5:30
ट्रम्प यांनी 'ट्रुथ सोशल' प्लॅटफॉर्मवरून एअरस्पेस बंद करण्यासंदर्भात घोषणा केली आहे...

डोनाल्ड ट्रम्प यांची 5000 KM दूर असलेल्या देशावर हल्ल्याची तयारी, केव्हाही होऊ शकतो हल्ला? एअरस्पेस बंदची घोषणा
अमेरिकेचे राष्ट्राध्यक्ष डोनाल्ड ट्रम्प यांनी व्हेनेझुएला (Venezuela) आणि जवळपासचा एअरस्पेस (Airspace) 'बंद' (Closed) घोषित केला आहे. व्हेनेझुएलावर दबाव वाढवण्याचा हा ट्रम्प यांचा आणखी एक प्रयत्न मानला जात आहे. यापूर्वी ट्रम्प यांनी व्हेनेझुएलाचे राष्ट्राध्यक्ष निकोलस मादुरो यांचे सरकार 'अवैध' घोषित केले होते. आता ट्रम्प यांच्या या कृतीमुळे अमेरिका व्हेनेझुएलावर हल्ला करण्याच्या तयारीत तर नाही ना? असा प्रश्न उपस्थित होत आहे. महत्वाचे म्हणजे, व्हेनेझुएला अमेरिकेपासून तब्बल 5000 किलोमीटर दूर आहे.
ट्रम्प यांनी 'ट्रुथ सोशल' प्लॅटफॉर्मवरून एअरस्पेस बंद करण्यासंदर्भात घोषणा केली आहे. त्यांनी सर्व एअरलाइन, पायलट, ड्रग्ज डीलर्स आणि मानवी तस्करांना उद्देशून लिहिले आहे की, "कृपया, व्हेनेझुएलावरील आणि त्याच्या जवळपासचे हवाई क्षेत्र पूर्णपणे बंद मानावे." ट्रम्प यांच्या या आदेशावर, अद्याप व्हेनेझुएलाच्या संपर्क मंत्र्यांची कुोठलीही प्रतिक्रिया आलेली नाही, तसेच अमेरिकेच्या संरक्षण विभागानेही त्यांच्या या पोस्टवर प्रतिक्रिया दिलेली नाही.
तत्पूर्वी, कॅरिबियनमध्ये (Caribbean) कथित ड्रग्ज बोटींविरुद्ध अमेरिकेचे हल्ले गेल्या काही महिन्यांपासून सुरूच आहेत. या शिवाय या भागात अमेरिकेची सैन्यतैनातही वाढली आहे. ट्रम्प यांनी व्हेनेझुएलामध्ये गुप्त सीआयए (CIA) मोहिमांना अधिकृतता दिली आहे. या आठवड्यात त्यांनी सैन्यदलाच्या सदस्यांना सांगितले होते की, व्हेनेझुएलातील संशयित ड्रग्ज तस्करांना रोखण्यासाठी अमेरिका लवकरच जमिनी स्तरावर मोहीम सुरू करेल.