दरोड्याच्या आरोपातून उपअधीक्षक मुजावरसह 15 जण निदरेष

दरोड्याच्या आरोपातून उपअधीक्षक मुजावरसह 15 जण निदरेष

सोलापूर: सातरस्ता चौकातील मोक्याच्या जागेच्या वादातून दरोडा टाकल्याच्या आरोपातून पोलीस उपअधीक्षक महिबूब मुजावर ( नागरी हक्क संरक्षण, अहमदनगर) यांच्यासह 15 जणांची सबळ पुराव्याअभावी सह जिल्हा न्यायाधीश एस. डी. अग्रवाल यांनी निदरेष मुक्तता केली.
तबसुम नजीर कारीगर (रा. बैतुल कमर, सिव्हिल लाईन सोलापूर) यांनी दिलेल्या फिर्यादीवरून पो. नि. मुजावर (वय 49, रा. प्रथम हॉटेलमागे सोलापूर) , त्यांची पत्नी निलोफर, मुलगी डॉ. बिलकिस यांच्यासह सुलताना जमादार, ज्युलेखा इनामदार, रहिमा कारीगर, इब्राहिम शेख, दादू उर्फ मुजीब सालार, खलील सालार, फैज नदाफ, अफताब कारीगर, सईद शेख, नजीर सय्यद, युन्नूस शेख, महिबूब शेख यांच्याविरुद्ध सदर बझार पोलीस ठाण्यात गुन्हा दाखल करण्यात आला होता. आरोपींनी 15 एप्रिल 2009 रोजी दुपारी अडीच वाजता फिर्यादीच्या घरात घुसून मारहाण करून मोबाईल हँडसेट, डायमंडची अंगठी असा ऐवज लुटून नेल्याचे फिर्यादीत म्हटले होते. बिलकिस वगळता इतर सर्व आरोपींना पोलिसांनी त्या दिवशी अटक करून न्यायालयात दोषारोपपत्र दाखल केले होते.
खटल्याच्या सुनावणीवेळेस सरकारतर्फे 12 साक्षीदार तपासले. सुनावणीसाठी फिर्यादी तबसुम हजर राहिलीच नाही. ती पाकिस्तानी नागरिक असल्याने पोलिसांना आढळली नाही. त्यामुळे आरोपींविरुद्ध खोटी फिर्याद दाखल करण्यात आल्याचा युक्तिवाद आरोपीचे वकील डी. एन. भडंगे, अब्बास काझी, मिलिंद थोबडे यांनी केला. सरकारतर्फे अँड. आनंद गोरे यांनी काम पाहिले.