Alert In Delhi: राजधानी दिल्लीमध्येदहशतवादी हल्ल्याची शक्यता असल्याचा अलर्ट दिल्ली पोलिसांना देण्यात आला आहे. दहशतवादी हल्ल्याच्या शक्यतेचा अलर्ट मिळाल्यानंतर दिल्ली पोलीस सतर्क झाले असून दिल्लीतील इस्रायल दूतावासाबाहेरील सुरक्षेत वाढ करण्यात आली आहे. तसंच या ठिकाणी येणाऱ्या वाहनांची झाडाझडती आणि तपासणी केली जात आहे. (Delhi police issued alert after receiving inputs terrorist attack on israeli embassy)
दिल्ली पोलिसांच्या सुत्रांनी दिलेल्या माहितीनुसार ६ सप्टेंबर रोजी इस्रायली लोक नववर्ष सेलिब्रेशन करतात. याच पार्श्वभूमीवर दूतावास आणि याबाजूच्या परिसरावर बारकाईनं लक्ष ठेवलं जात आहे. दिल्ली पोलिसांसह सीमा सुरक्षा दलाचेही जवान इस्रायल दूतावासाबाहेर तैनात करण्यात आले आहेत.
इस्रायली दूतावासात शिरून दहशतवादी हल्ला होऊ शकतो अशी माहिती गुप्तचर विभागानं दिल्ली पोलिसांना दिली आहे. इस्रायली नववर्ष स्वागताच्या निमित्तानं दूतावासात दरवर्षी गर्दी होते. याचाच फायदा घेऊन दहशतवादी हल्ला केला जाऊ शकतो, असा अलर्ट दिल्ली पोलिसांना देण्यात आला आहे. या माहितीनुसार पोलिसांनी इस्रायल दूतावास, वाणिज्य दूतावास आणि त्यातील कर्मचाऱ्यांच्या सुरक्षेत वाढ करण्यात आली आहे.