मेघालयात मृत्यूचा थरार! अवैध कोळसा खाणीत भीषण स्फोट; १८ मजुरांचा करुण अंत

मेघालयमधील पूर्व जयंतिया हिल्स जिल्ह्यातील एका अवैध कोळसा खाणीत झालेल्या भीषण स्फोटात तब्बल १८ मजुरांचा मृत्यू झाला आहे.

ईशान्येकडील मेघालय राज्यातून एक अत्यंत काळजाचा थरकाप उडवणारी बातमी समोर आली आहे. पूर्व जयंतिया हिल्स जिल्ह्यातील एका अवैध कोळसा खाणीत झालेल्या भीषण स्फोटात तब्बल १८ मजुरांचा मृत्यू झाला आहे. या दुर्घटनेमुळे संपूर्ण परिसरात शोककळा पसरली असून खाणीमध्ये अजूनही काही लोक अडकले असल्याची भीती व्यक्त केली जात आहे.

नेमकी घटना काय? 

मेघालयमधील पूर्व जयंतिया हिल्स जिल्ह्यातील थांगस्कू भागात ही घटना घडली. पोलीस महासंचालक आय. नोंगरंग यांनी दिलेल्या माहितीनुसार, खाणीत स्फोट झाला तेव्हा अनेक मजूर आत काम करत होते. बचाव पथकाच्या हाती आतापर्यंत १६ मृतदेह लागले असून मृतांचा एकूण आकडा १८ वर पोहोचला आहे. स्फोटाची तीव्रता इतकी भीषण होती की, मजुरांना सावरण्याची संधीही मिळाली नाही. जखमींना तातडीने उपचारासाठी राजधानी शिलाँगला हलवण्यात आले आहे.

पंतप्रधान मोदींकडून शोक व्यक्त, मदतीची घोषणा 

पंतप्रधान नरेंद्र मोदी यांनी या घटनेवर तीव्र दुःख व्यक्त केले आहे. "मेघालयातील दुर्घटनेने मन व्यथित झाले आहे. ज्यांनी आपले प्राण गमावले, त्यांच्या कुटुंबियांच्या दुःखात मी सहभागी आहे," अशा भावना पंतप्रधानांनी व्यक्त केल्या. पंतप्रधान राष्ट्रीय मदत निधीतून मृतांच्या नातेवाईकांना प्रत्येकी २ लाख रुपये आणि जखमींना ५० हजार रुपयांची मदत जाहीर करण्यात आली आहे.

अवैध खाणकामाचा प्रश्न पुन्हा ऐरणीवर 

राष्ट्रीय हरित प्राधिकरणाने २०१४ मध्ये मेघालयातील रेट होल खाणींवर बंदी घातली होती. असे असतानाही, ही खाण अवैधरित्या चालवली जात होती का? या प्रश्नावर बोलताना पोलीस अधीक्षक विकास कुमार यांनी "प्राथमिक पाहणीत ही खाण अवैध असल्याचेच वाटते," असे सांगितले. बंदी असतानाही अशा जीवघेण्या खाणी कोणाच्या आशीर्वादाने सुरू आहेत, असा गंभीर प्रश्न आता उपस्थित होत आहे.

या स्फोटाचे नेमके कारण अद्याप स्पष्ट झालेले नाही. मात्र, ढिगाऱ्याखाली आणखी काही मजूर दबले गेले असण्याची शक्यता असल्याने बचाव कार्य अधिक वेगाने राबवले जात आहे. स्थानिक प्रशासन आणि पोलीस यंत्रणा घटनास्थळी तैनात असून बेपत्ता लोकांचा शोध सुरू आहे.