नवा खुलासा! चेतन त्याच्या तीन पत्नी आणि पाच मुलांसह एकाच खोलीत झोपायचा; गाझियाबाद प्रकरणी नवा खुलासा

गाझियाबादमधील भारत सिटी सोसायटीमध्ये तीन बहिणींच्या आत्महत्येच्या तपासादरम्यान, पोलिसांना आणखी एक मोठी माहिती मिळाली. चेतन त्याच्या संपूर्ण कुटुंबासह एका ३ बीएचके फ्लॅटच्या एकाच खोलीत राहत होता.

गाझियाबादच्या भारत सिटी सोसायटीमध्ये तीन अल्पवयीन बहि‍णींनी केलेल्या आत्महत्ये प्रकरणी दररोज नवीन खुलासे होत आहेत. नवव्या मजल्यावरून उडी मारणाऱ्या मुलींचे वडील चेतन कुमार यांची कौटुंबिक परिस्थिती, त्यांचे तीन लग्न, एक प्रेयसी, त्यांची आर्थिक परिस्थिती आणि मुलांचे शाळा सोडल्याची प्रकरणे तपासली जात आहेत. पोलिसांच्या मते, ३ बीएचके फ्लॅटमध्ये कुटुंबाने एकाच खोलीत राहणे आणि वडिलांचे परस्परविरोधी विधान हे या प्रकरणात महत्त्वाचे पुरावे मानले जातात.

पोलिसांनी दिलेल्या माहितीनुसार, भारत सिटी सोसायटीमधील ३ बीएचके फ्लॅटमध्ये तीन बेडरूम असूनही, चेतन त्याच्या कुटुंबासह राहत होता, पण संपूर्ण कुटुंब एकाच खोलीत झोपत होते. चेतन, त्याच्या तीन बायका आणि पाच मुले एकाच खोलीत राहत होती. चौकशीदरम्यान चेतनला विचारण्यात आले की, तीन मुली रात्री उशिरा खोलीतून कशा बाहेर पडल्या आणि कोणाच्या लक्षात का आले नाही, तर त्याने ते एक सामान्य दिनचर्या असल्याचे सांगितले. हे उत्तर आता पोलिसांसाठी संशयाचे एक मोठे कारण बनले आहे. 

चेतनचे वैयक्तिक आयुष्य पोलिस तपासाचा सर्वात गुंतागुंतीचा भाग बनले आहे. त्याने आधीच तीन लग्न केल्याचे कबूल केले आहे. त्याच्या मते, त्याचे पहिले लग्न २०१० मध्ये सुजातासोबत, दुसरे २०१३ मध्ये हिनासोबत आणि तिसरे लग्न २०१८ च्या सुमारास टीनासोबत झाले होते. ज्यावेळी पोलिसांनी या दाव्यांची तुलना वय आणि जन्माच्या आकडेवारीशी केली तेव्हा संपूर्ण कालक्रम उलगडू लागला. सुजातापासून त्याची मोठी मुलगी सुमारे १६ वर्षांची असल्याचे सांगितले जाते, यामुळे त्याने त्याच्या पहिल्या पत्नीपासून मुले नसल्यामुळे पुन्हा लग्न केले या दाव्यावर प्रश्नचिन्ह उपस्थित होते. सर्वात धक्कादायक ट्विस्ट तेव्हा आला जेव्हा चेतनने त्याची तिसरी पत्नी टीनाबाबत दिलेले विधान बदलले. सुरुवातीला त्याने पोलिसांना सांगितले की टीना त्याची पत्नी नव्हती, तर त्याची मेहुणी होती.

चौकशीत त्याने टीनाशी लग्न केल्याचे कबूल केले. टीना सुमारे २२ वर्षांची असल्याचे सांगितले जाते. तिला तीन वर्षांची मुलगी देखील आहे. चेतनचे जबाब वारंवार बदलत आहेत, यामुळे त्याच्या विश्वासार्हतेवर गंभीर प्रश्नचिन्ह उपस्थित होत आहेत.