निवडणूक आयोगाच्या पत्रावर भाजपचा शिक्का! केरळमध्ये खळबळ, अधिकारी तडकाफडकी निलंबित

केरळमध्ये निवडणूक आयोगाच्या पत्रावर भाजपचा शिक्का आढळल्याने खळबळ उडाली.

Kerala Assembly Election 2026: देशात पश्चिम बंगाल, तामिळनाडू आणि केरळमधील विधानसभा निवडणुकीसाठी तयारी सुरु असतानाच, केंद्रीय निवडणूक आयोगाच्या एका अधिकृत पत्राने नवा वाद निर्माण केला आहे. निवडणूक आयोगाकडून राजकीय पक्षांना पाठवण्यात आलेल्या एका अधिकृत पत्रावर चक्क भाजप केरळ युनिटचा शिक्का आढळल्याने खळबळ उडाली आहे. या प्रकरणावरून विरोधकांनी निवडणूक आयोगाच्या निष्पक्षतेवर गंभीर प्रश्नचिन्ह उपस्थित केले असून, आयोगाला भाजपची बी-टीम म्हटले आहे.

नेमकं प्रकरण काय?

केरळमध्ये ९ एप्रिल रोजी होणाऱ्या मतदानापूर्वी सोशल मीडियावर एक पत्र व्हायरल झाले. १९ मार्च २०१९ च्या एका पत्रासोबत जोडलेल्या प्रतिज्ञापत्रावर निवडणूक आयोगाच्या अधिकृत शिक्क्याऐवजी भारतीय जनता पार्टी, केरळ असा शिक्का मारलेला दिसला. हे पत्र समोर येताच सीपीआय(ए) ने सोशल मीडियावरुन आयोगावर हल्लाबोल केला. भाजप आणि निवडणूक आयोग आता एकाच टेबलावरून काम करत आहेत का? असा बोचरा सवाल डाव्या पक्षांनी विचारला आहे.

विरोधकांचा तुफान हल्ला

या प्रकरणावरून काँग्रेस, तृणमूल काँग्रेस आणि डाव्या पक्षांनी आयोगाला घेरले आहे. "आम्ही ऐकलं होतं की मतदान यंत्रावर कोणतंही बटण दाबलं की कमळाला मतदान होतं, पण निवडणूक आयोग आणि भाजप एकच शिक्का वापरत असल्याचे पहिल्यांदाच पाहत आहोत," अशी टीका डाव्या पक्षाने केली. तर निवडणूक आयोग भाजपच्या कार्यालयातून चालतोय का? तुमच्या लेटरहेडवर भाजपचा शिक्का येतोच कसा? असा सवाल काँग्रेसने केला. तृणमूलच्या खासदार महुआ मोइत्रा यांनी, "आयोगाने आता स्वतःच अधिकृतपणे कबूल केले आहे की ते भाजपची बी-टीम आहेत," अशी टीका केली.

निवडणूक आयोगाचा बचाव

वाढता वाद पाहून केरळच्या मुख्य निवडणूक अधिकाऱ्यांनी तातडीने स्पष्टीकरण दिले आहे. त्यांच्या म्हणण्यानुसार, भाजपच्या केरळ युनिटने उमेदवारांच्या गुन्हेगारी पार्श्वभूमीच्या मार्गदर्शक तत्त्वांची माहिती मागवली होती. त्यासाठी त्यांनी २०१९ च्या एका जुन्या आदेशाची झेरॉक्स प्रत आयोगाकडे जमा केली. त्या फोटोकॉपीवर भाजपचा शिक्का आधीच होता. कार्यालयातील कर्मचाऱ्यांच्या नजरचुकीमुळे, भाजपचा शिक्का असलेली तीच प्रत तशीच इतर सर्व राजकीय पक्षांना आणि निवडणूक अधिकाऱ्यांना पाठवण्यात आली.

असिस्टंट सेक्शन ऑफिसर निलंबित

निवडणूक आयोगाने हे प्रकरण गांभीर्याने घेत या फाइलची हाताळणी करणाऱ्या असिस्टंट सेक्शन ऑफिसरला निलंबित केले आहे. २१ मार्च रोजीच हे पत्र अधिकृतपणे मागे घेण्यात आले असून नवीन पत्र जारी करण्यात आले असल्याचे आयोगाने स्पष्ट केले. "कुणीही दिशाभूल करणारे संदेश पसरवू नयेत, निवडणूक प्रक्रिया बाह्य प्रभावापासून मुक्त आहे," असे आवाहनही आयोगाने केले आहे.

निवडणुकीच्या तोंडावर 'लेटर वॉर'

केरळमध्ये १४० जागांसाठी ९ एप्रिलला मतदान होणार असून ४ मे रोजी निकाल लागणार आहे. मतदानाला काही दिवस उरले असतानाच हा घोळ समोर आल्याने मतदारांमध्ये संभ्रमाचे वातावरण निर्माण झाले आहे.