‘फक्त ६ जणच आलेत, बाकीचे कुठे आहेत’? राहुल गांधींचा सवाल, नेते म्हणाले आपले एवढेच आमदार जिंकलेत

Rahul Gandhi News: काँग्रेसचे ज्येष्ठ नेते राहुल गांधी यांनी बिहारमधील निराशाजनक कामगिरीचा आढावा घेण्यासाठी बोलावलेल्या बैठकीत घडलेल्या घडामोडींची आता दिल्लीत राजकीय वर्तुळात चर्चा सुरू आहे.

नुकत्याच झालेल्या बिहार विधानसभा निवडणुकीमध्ये राष्ट्रीय लोकशाही आघाडीने दणदणीत विजय मिळवला होता. तर महाआघाडीला दारुण पराभवाचा सामना करावा लागला होता. त्यात काँग्रेसला तर केवळ सहा जागांवरच समाधान मानावे लागले. दरम्यान, काँग्रेसचे ज्येष्ठ नेते राहुल गांधी यांनी बिहारमधील निराशाजनक कामगिरीचा आढावा घेण्यासाठी बोलावलेल्या बैठकीत घडलेल्या घडामोडींची आता दिल्लीत राजकीय वर्तुळात चर्चा सुरू आहे.

बिहार विधानसभा निवडणुकीत काँग्रेसला लढवलेल्या ६१ जागांपैकी केवळ ६ जागांवरच विजय मिळवता आला होता. या निराशाजनक कामगिरीनंतर काँग्रेसचे प्रदेशाध्यक्ष राजेश राम हे राजीनामा घेऊन पक्षाचे अध्यक्ष मल्लिकार्जुन खर्गे यांच्याकडे गेले होते. मात्र खर्गे यांनी त्यांना हा राजीनामा राहुल गांधी यांच्याकडे देण्यास सांगितले. मात्र बैठक सुरू झाल्यानंतर घडलेल्या घडामोडी ह्या काँग्रेसला संघटनात्मक दृष्टीने अधिकच चिंतेत टाकणाऱ्या होत्या.

सूत्रांनी दिलेल्या माहितीनुसार आढावा बैठकीला सुरुवात केल्यावर राहुल गांधी यांनी बिहारचे प्रभारी कृष्णा अल्लावरू यांना बिहारमध्ये विजयी झालेल्या काँग्रेसच्या आमदारांनाआत बोलावण्यास सांगितले. त्यावर अल्लावरू हळू आवाजात म्हणाले की,’सर आपले सहाच आमदार जिंकले आहेत आणि ते इथेच उपस्थित आहेत’. हा संवाद ऐकून तिथे उपस्थित असलेले इतर नेते अवाक् झाले. 
बिहारमध्ये महाआघाडीतील घटकपक्ष म्हणून लढत असलेल्या काँग्रेसला केवळ सहा जागांवरच विजय मिळवता आला याची कदाचित राहुल गांधी यांना कल्पना नसावी.

दरम्यान, या बैठकीमध्ये पुढे जे काही घडलं ते अधिकच धक्कादायक होतं. आढावा बैठकीत काँग्रेसची कामगिरी २०१० च्या तुलनेत अधिक चांगली झाल्याचे सांगण्यात आले. २०१०मध्ये पक्षाने केवळ ४ जागा जिंकल्या होत्या. त्या तुलनेत यावेळी सहा जागा जिंकल्या. म्हणजे पक्षाची कामगिरी आधीच्या तुलनेच समाधानकारक झाल्याचा युक्तिवाद करण्यात आला. मात्र काँग्रेसच्या बैठकीत घडलेल्या या घडामोडी आता चर्चेचा विषय ठरल्या आहेत.