लंडनला जाण्यासाठी आधी १९ जूनचं होतं बुकिंग; पतीच्या बर्थडेसाठी प्लॅन बदलला, १२ जूनचं तिकिट काढलं

हरप्रीत बंगळुरुत खासगी कंपनीत काम करत होती. वर्क फ्रॉम होम असल्याने ती लंडनला जाण्याच्या तयारीत होती. 

इंदूर - अहमदाबाद ते लंडन जाणाऱ्या एअर इंडियाच्या विमानाचा गुजरातमध्ये भीषण अपघात झाला. या अपघातात २०० हून अधिक लोकांना जीव गमवावा लागला. या अपघातात इंदूर येथील एका महिलेचाही जीव गेला आहे. गुरुवारी दुपारी घडलेल्या या घटनेमुळे संपूर्ण देशात हळहळ व्यक्त करण्यात येत आहे. या दुर्घटनेतील मृतांमध्ये इंदूरची हरप्रीत होरा या महिलेचाही समावेश होता. एअर इंडियाच्या प्रवासी यादीत तिचे नाव ६५ नंबरच्या सीटवर होते. हरप्रीत तिच्या पतीला भेटण्यासाठी लंडनला जात होती. मात्र या दुर्घटनेत तिचा जीव गेल्याने कुटुंबात शोककळा पसरली आहे. विशेष म्हणजे हरप्रीतचे तिकिट आधी १९ जून रोजी होते परंतु १६ जूनला पतीचा बर्थडे असल्याने तिने ते तिकिट कॅन्सल करून १२ जूनचे तिकिट काढले होते.

इंदूरमध्ये होते हरप्रीतचे सासर

हरप्रीत इंदूरच्या राजमोहल्ला परिसरात राहणाऱ्या होरा कुटुंबातील सून होती. तिचे पती रॉबी होरा मागील ३ वर्षापासून लंडनला एका खासगी कंपनीत नोकरी करतात. हरप्रीत आणि रॉबी यांचे लग्न २०२० साली झाले होते. हरप्रीत बंगळुरुत खासगी कंपनीत काम करत होती. वर्क फ्रॉम होम असल्याने ती लंडनला जाण्याच्या तयारीत होती. 

१९ जूनला लंडनला जाणार होती

हरप्रीतच्या कुटुंबाने सांगितले की, तिने आधी लंडनला जाणारे तिकिट १९ जूनचे बुक केले होते. परंतु आमच्या मुलाचा म्हणजे तिच्या पतीचा वाढदिवस १६ जून रोजी होता. त्यामुळे १९ जूनचे तिकिट कॅन्सल करत तिने १२ जूनचे तिकीट काढले आणि दुर्दैवाने हाच तिचा अखेरचा प्रवास ठरला. या दुर्घटनेमुळे हरप्रीतच्या माहेरी आणि सासरी दोन्ही कुटुंबाला धक्का बसला आहे. काही दिवसांपूर्वीच ती माहेरी राहून आली होती आणि इथूनच लंडनसाठी जाणार होती. 

दरम्यान, या दुर्घटनेची माहिती कुटुंबाला मिळताच सगळ्यांचे डोळे पाणावले. काही तासांपूर्वीच हरप्रीतला प्रवासासाठी शुभेच्छा दिल्या होत्या. परंतु कुणालाही साधी भनकही लागली नाही की काही मिनिटांनी सर्वकाही बदलणार आहे. हरप्रीतच्या अपघाताची बातमी मिळताच रॉबी लंडनहून इंदूरला येत आहे तर कुटुंबातील काही सदस्य अहमदाबाद येथे रवाना झालेत अशी माहिती रॉबी होराचे काका जसवीर होरा यांनी माध्यमांना दिली.