भारताच्या हाती लागली मोठी शक्ती, धावत्या रेल्वेतून शत्रूवर मिसाईल डागता येणार; अग्नी प्राइमची चाचणी यशस्वी...
By ऑनलाइन लोकमत | Updated: September 25, 2025 10:57 IST2025-09-25T10:57:18+5:302025-09-25T10:57:55+5:30
Agni Prime Missile test From Train: भारताच्या 'अग्नी प्राइम' क्षेपणास्त्राची रेल्वे-आधारित मोबाईल लाँचर प्रणालीतून यशस्वी चाचणी! या २००० किमी पल्ल्याच्या क्षेपणास्त्रामुळे संरक्षण क्षेत्रात मोठी झेप. धावत्या ट्रेनमधून लक्ष्याचा वेध घेणे शक्य झाल्याने भारत निवडक देशांच्या यादीत. चाचणीचे सामरिक महत्त्व आणि राजनाथ सिंह यांची प्रतिक्रिया वाचा.
भारताच्या हाती लागली मोठी शक्ती, धावत्या रेल्वेतून शत्रूवर मिसाईल डागता येणार; अग्नी प्राइमची चाचणी यशस्वी...
नवी दिल्ली : भारताच्या संरक्षण सिद्धतेत आज एक नवा अध्याय जोडला गेला आहे. संरक्षण संशोधन आणि विकास संस्थेने (DRDO) विकसित केलेल्या मध्यम पल्ल्याच्या 'अग्नी प्राइम' (Agni Prime) क्षेपणास्त्राची रेल्वे-आधारित मोबाईल लाँचर प्रणालीतून (Rail-based Mobile Launcher System) यशस्वी चाचणी करण्यात आली आहे. या चाचणीमुळे आता धावत्या ट्रेनमधूनही हे क्षेपणास्त्र सहजपणे डागणे शक्य होणार आहे.
संरक्षण मंत्री राजनाथ सिंह यांनी 'एक्स' (X) या सोशल मीडिया प्लॅटफॉर्मवर याची माहिती दिली. रेल्वे नेटवर्कवरून मिसाईल प्रक्षेपित करण्याची क्षमता असणाऱ्या जगातील मोजक्या देशांच्या समूहात भारताचा समावेश झाला आहे.
२ हजार किमीचा पल्ला, कमी वेळेत प्रक्षेपण
क्षमता: 'अग्नी प्राइम' हे पुढील पिढीचे क्षेपणास्त्र असून ते २ हजार किलोमीटरपर्यंतच्या लक्ष्याचा अचूक वेध घेऊ शकते.
चाचणीची खास बाब: हे प्रक्षेपण एका खास डिझाइन केलेल्या रेल्वे-आधारित मोबाईल लाँचरमधून करण्यात आले. हे लाँचर कोणत्याही पूर्वतयारीशिवाय रेल्वे नेटवर्कवर धावण्याची क्षमता ठेवते.
सामरिक महत्त्व: या प्रणालीमुळे युद्धजन्य परिस्थितीत अत्यंत कमी वेळेत क्षेपणास्त्रे प्रक्षेपित करण्याची क्षमता मिळाली आहे.
आधुनिक तंत्रज्ञान आणि बदललेली भूमिका
'अग्नी प्राइम' हे क्षेपणास्त्र नवीन प्रोपल्शन प्रणाली, प्रगत नेव्हिगेशन (Advanced Navigation) आणि मार्गदर्शन प्रणाली (Guidance System) यांसारख्या अत्याधुनिक वैशिष्ट्यांनी सुसज्ज आहे. हे 'कॅनिस्टर-लाँच' प्रणालीवर आधारित असल्याने आवश्यकतेनुसार यास रेल्वे किंवा रस्त्याच्या मार्गाने सहजपणे एका ठिकाणाहून दुसऱ्या ठिकाणी हलवता येते.
अग्नी-I ची जागा घेणार
स्ट्रॅटेजिक फोर्स कमांड (SFC) द्वारे आयोजित करण्यात आलेली ही 'अग्नी प्राइम'ची पहिली प्री-इंडक्शन रात्रीची चाचणी होती. हे क्षेपणास्त्र टप्प्याटप्प्याने 'एसएफसी'च्या शस्त्रागारातील जुन्या 'अग्नी-I' (७०० किमी रेंज) क्षेपणास्त्रांची जागा घेणार आहे. तसेच, पाकिस्तानसह इतर कोणत्याही धोक्याला तातडीने प्रत्युत्तर देण्यासाठी याची रणनीतिक रचना करण्यात आली आहे. संरक्षण मंत्री राजनाथ सिंह यांनी या महत्त्वपूर्ण यशस्वी कामगिरीबद्दल डीआरडीओ, स्ट्रॅटेजिक फोर्स कमांड आणि सशस्त्र दलांचे अभिनंदन केले आहे.