Arvind Kejriwal : "...तर मी राजकारण सोडेन"; अरविंद केजरीवालांचं भाजपाला मोठं आव्हान, काँग्रेसवरही निशाणा

AAP Arvind Kejriwal And BJP : अरविंद केजरीवाल यांनी रोड शो दरम्यान जनतेला संबोधित केलं. भाजपा आणि काँग्रेस दोघांवरही जोरदार हल्लाबोल केला.

गुजरातमधील विसावदर विधानसभा जागेवर होणाऱ्या पोटनिवडणुकीवरून राजकारण तापलं आहे. आज आम आदमी पक्षाने येथे एक भव्य रोड शो आयोजित केला होता, ज्यामध्ये अरविंद केजरीवाल, पंजाबचे मुख्यमंत्री भगवंत मान आणि दिल्ली सरकारच्या मंत्री आतिशी सहभागी झाल्या होत्या. या रोड शोद्वारे आपनेभाजपाचा बालेकिल्ला असलेल्या गुजरातमधील विसावदरमध्ये आपली ताकद दाखवली. पक्षाने गोपाल इटालिया यांना विसावदरमधून उमेदवार म्हणून घोषित केलं आहे.

अरविंद केजरीवाल यांनी रोड शो दरम्यान जनतेला संबोधित केलं. भाजपा आणि काँग्रेस दोघांवरही जोरदार हल्लाबोल केला. "विसावदरच्या लोकांनी १८ वर्षे भाजपाला प्रवेश करू दिला नाही, आधी काँग्रेसला संधी दिली, आता यावेळी 'आप'ला संधी द्या" असं म्हटलं आहे.

"...तर मी राजकारण सोडून देईन"

केजरीवाल यांनी भाजपावर काँग्रेस आणि 'आप'च्या आमदारांना फोडून त्यांना आपल्या पक्षात सामील करून घेतल्याचा आरोप केला. त्यांनी स्टेजवरून आव्हान देत म्हटलं की, "मी तुम्हाला आव्हान देतो गोपाल इटालिया यांना फोडून दाखवा, जर तुम्ही त्यांना फोडू शकलात तर मी राजकारण सोडून देईन." यावर गोपाल इटालिया यांनी हसत हसत "सर, असं काही नाही" असं उत्तर दिलं.

विसावदर के रोड-शो में उमड़ी अपार भीड़, जिसने बता दिया कि जनता का भरोसा आज भी AAP पर कायम है। गुजरात के विसावदर से आज आम आदमी पार्टी के उम्मीदवार गोपाल भाई इटालिया ने नामांकन दाखिल किया। इस उपचुनाव में जनता एक बार फिर से AAP को ही चुनेगी। pic.twitter.com/nYNKXbSuoN

— Arvind Kejriwal (@ArvindKejriwal) May 31, 2025

केजरीवाल यांनी काँग्रेसवर साधला निशाणा

केजरीवाल यांनी आपल्या भाषणात काँग्रेसवरही टीका केली आणि म्हटलं की "काँग्रेस हा एक नंबरचा फसवा पक्ष आहे." या विधानाद्वारे त्यांनी सूचित केलं की 'आप' आता स्वतःला बळकट करण्याच्या उद्देशाने गुजरातच्या राजकारणात प्रवेश करत आहे. भगवंत मान आणि आतिशी यांनी रोड शो दरम्यान जनतेकडून पाठिंबा मागितला आणि 'आप'चे "प्रामाणिक राजकारण" पुढे नेण्याबद्दल सांगितलं.

१९ जून रोजी होणार मतदान

गुजरातच्या विसावदर विधानसभा पोटनिवडणुकीसाठी १९ जून रोजी मतदान होणार आहे तर २३ जून रोजी मतमोजणी होणार आहे. उमेदवारी अर्ज दाखल करण्याची शेवटची तारीख २ जून आहे आणि उमेदवारी अर्जांची छाननी ३ जून रोजी होईल. उमेदवार ५ जूनपर्यंत आपले अर्ज मागे घेऊ शकतात. या पोटनिवडणुकीबाबत भाजपा, काँग्रेस आणि आप हे तिन्ही प्रमुख पक्ष आपापल्या पातळीवर विजयाचा दावा करत आहेत.