चालत्या रिक्षात अचानक झाला स्फोट; आगीत महिला प्रवासी जिवंत जळाली, ५ जण जखमी

दरभंगा मुझफ्फरपूर इथल्या राज लक्ष्मी हॉटेलजवळ अचानक रिक्षातील बॅटरीचा स्फोट झाला. हा स्फोट इतका जबरदस्त होता की पाहता क्षणी रिक्षाला मोठी आग लागली. 

मुझफ्फरपूर - बिहारच्या मुझफ्फरपूर येथे हैराण करणारा प्रकार समोर आला आहे. याठिकाणी एका रिक्षात बॅटरीमुळे झालेल्या स्फोटात एका मुलीसह महिलेचा मृत्यू झाला आहे. या घटनेवेळी महिलेसोबत रिक्षात अन्य प्रवासीही होते. त्यांनाही गंभीर दुखापत झाली आहे. रिक्षातील प्रवासी स्फोटात जखमी झाले असून त्यांना स्थानिकांच्या मदतीने नजीकच्या रुग्णालयात उपचारासाठी नेले आहे.

पोलिसांच्या माहितीनुसार, मधुबनीच्या खजौली येथून रिक्षात बसून ६ जण मुझफ्फरपूर येथे चालले होते त्यावेळी ही दुर्घटना घडली. ही रिक्षा गयाघाट परिसरात पोहचली तेव्हा त्यातील बॅटरीचा स्फोट झाला. ज्यामुळे एक महिला प्रवासी जिवंत जळाली तर इतर जखमी झालेत. मृत महिला प्रवासी मधुबनी जिल्ह्यातील खजौली येथील रहिवासी असून तिचे नाव निशा होते. पोलीस सध्या या प्रकरणाची चौकशी करत आहेत. दरभंगा मुझफ्फरपूर इथल्या राज लक्ष्मी हॉटेलजवळ अचानक रिक्षातील बॅटरीचा स्फोट झाला. हा स्फोट इतका जबरदस्त होता की पाहता क्षणी रिक्षाला मोठी आग लागली. 

आई-लेकीचा मृत्यू, ५ जखमी

 स्फोट होऊन लागलेल्या आगीत रिक्षातून प्रवास करणाऱ्या कामरून निशा आणि त्यांच्या मुलीचा दुर्दैवी मृत्यू झाला आहे. इतर ५ प्रवाशांना उपचारासाठी रुग्णालयात नेले आहे. स्थानिकांनी या घटनेची माहिती पोलिसांना दिल्यानंतर तात्काळ घटनास्थळी अग्निशमन दलाला पाचारण करण्यात आले. त्यानंतर अग्निशमन दलाच्या जवानांनी आग विझवली. या घटनेची सखोल चौकशी करावी अशी मागणी केली जात आहे. सध्या पोलीस अधिक चौकशी करत आहेत.