Gujarat Accident:गुजरातमधील नवसारी जिल्ह्यातून एक अंगावर काटा आणणारी घटना समोर आली आहे. दारासमोर खेळत असताना एक ३ वर्षाच्या मुलगा २ हजार किलो वजनाच्या एसयूव्ही गाडी खाली आला. मात्र चमत्कारिकरित्या तो चिमुकला मुलगा सुखरूप बचावला. मुलाच्या कुटुंबियांसमोरच ही घटना घडली. मुलगा गाडीखाली येताच कुटुंबियांनी आक्रोश केला. मात्र मुलगा गाडीखालून सुखरूप बाहेर आल्यानंतर त्यांच्या जीवात जीव आला. या घटनेचा सीसीटीव्ही व्हिडिओही समोर आला आहे, ज्यामध्ये संपूर्ण घटना स्पष्टपणे दिसत आहे.
गुजरातमध्ये एका चमत्कारापेक्षाही मोठी घटना घडली ज्यात एका ३ वर्षाच्या मुलाला एसयूव्हीखाली आल्यानंतर वाचवण्यात यश आले. ही संपूर्ण घटना मुलाच्या घराजवळ बसवलेल्या सीसीटीव्ही कॅमेऱ्यात कैद झाली. या घटनेचा व्हिडिओ आता व्हायरल झाला असून लोक आश्चर्य व्यक्त करत आहेत. व्हिडीओमध्ये मुलगा घराच्या अंगणात खेळताना टोयोटा फॉर्च्युनर गाडीखाली येताना दिसत आहे.
नवसारी जिल्ह्यातील गंधवी तालुक्यात ही घटना घडली.हा मुलगा त्याच्या घराबाहेर इतर मुलांसोबत खेळत होता. तेव्हा तिथून एक फॉर्च्युनर एसयूव्ही कार येत होती. गाडी पुढे येताच तीन वर्षांचा मुलगा त्याखाली आला. कार चालकाने सावधगिरी दाखवत तात्काळ ब्रेक लावले, ज्यामुळे मोठा अपघात टळला. मुलाच्या कुटुंबातील इतर सदस्यही धावत तिथे आले आणि त्याला सुरक्षित बाहेर काढण्यात आले.
मुलाच्या रडण्याचा आवाज ऐकताच एक महिला कदाचित त्याची आई धावत आली आणि ड्रायव्हरला गाडी थांबवण्यास सांगितले. व्हिडिओमध्ये ती महिला ओरडताना आणि गाडीखाली असलेल्या बाळाला शोधताना दिसत आहे. काही सेकंदांनंतर त्या महिलेने बाळाला बाहेर काढले. चमत्कारिकरित्या, या घटनेत मुलाला एकही ओरखडा आला नाही. जर त्या महिलेने वेळेवर पोहोचून गाडी थांबवली नसती तर ही घटना जीवावर बेतली असती.
दरम्यान, गेल्या वर्षी महाराष्ट्रातूनही अशीच एक घटना समोर आली होती. वसईमध्ये एका सहा वर्षांच्या मुलाला कारने चिरडले होते. या घटनेचे सीसीटीव्ही फुटेज व्हायरल झाले होते. कारने मुलाला धडक दिल्यानंतर त्याला फरफटत नेले होते. गाडी त्याच्या अंगावरून गेल्यानंतर, तो मुलगा वेदनेने रडत उभा राहिला होता. नंतर मुलाच्या पालकांनी ड्रायव्हरविरुद्ध तक्रार दाखल केली.