चांदवडला रुग्णालयाच्या पायरीवरच युवकाचा मृत्यू

चांदवड : येथील ट्रामा केअर सेंटरमधील कोविड सेंटरमध्ये तपासणीसाठी आलेल्या युवकाचा रूग्णालयाच्या पायरीवरच  मृत्यू झाला.  
वडनेर भैरवजवळील खंडाळवाडी येथील अरुण उत्तम माळी (३५) हा मंगळवार, २० एप्रिल रोजी दुपारी तीन वाजण्याच्या सुमारास पत्नी सुरेखा हिच्याबरोबर चांदवड येथील ट्रामा केअर सेंटरमधील  कोविड सेंटर येथे तब्बेत बरी नसल्याने तपासणीसाठी आला होता. 
रुग्णालयातील डॉक्टरांनी बेड शिल्लक नसल्याने बेड उपलब्ध करण्याचा प्रयत्न केला. माळी यांची ऑक्सिजन लेव्हल अगदी ३० ते ३५ पर्यंतच होती. त्यामुळे हा रुग्ण कोविड सेंटरच्या पायरीजवळ कोसळला.  त्याला तातडीने रुग्णालयात स्ट्रेचरवर  नेवून  डॉ. सोनवणे यांनी तपासणी केली. तोपर्यंत त्याची प्राणज्योत मालवली. हा रुग्ण गेल्या पाच ते सहा दिवसांपासून आजारी असल्याचे सांगितले जात आहे. त्यांच्या पश्चात पत्नी सुरेखा, मुलगी आरती, मुलगा आदित्य आहे.