प्रेसगेट समोर सेवानिवृत्तांचे पोस्टर्स
नाशिक : नाशिकरोड येथील दोन्ही प्रेससमोर सेवानिवृत्त झालेल्यांचे मोठ मोठे डिजिटल फलक लावण्यात आले आहेत. गेल्या ३१जानेवारीला सेवानिवृत्त झालेल्यांची संख्या मोठी असल्याने मित्र परिवाराकडून प्रेसच्या मार्गावर सेवानिवृत्तीचे फलक लावले आहेत. एकापेक्षा अधिक आणि भव्य फलक लावण्यात आले आहेत.
बसस्थानकांमध्ये खासगी वाहनांचे पार्किंग
नाशिक : शहरातील सीबीएस बसस्थानक येथे खासगी वाहनांचे पार्किंग वाढले आहे. जुना सीबीएस परिसर मोठा असून जवळच असलेल्या न्यायालयीन कामकाजासाठी आलेले अनेक नागरिक बसस्थानकाच्या आवारात वाहने उभी करीत आहेत. अनेक प्रवासी देखील आवारात वाहने उभी करून बसने प्रवास करीत असतात.
स्मार्ट पदपथावर दुचाकीचे वाहनतळ
नाशिक : शहरातील स्मार्ट रोडच्या बाजूला तयार करण्यात आलेल्या पदपथावर दुचाकीचे वाहनतळ तयार झाले आहे. न्यायालय आवारात खासगी वाहनांना बंदी असल्याने न्यायायलीन कामकाजासाठी येणारे अनेक लोक पदपथावरच आपली दुचाकी वाहने उभी करीत आहेत. त्यामुळे दुचाकी वाहनांना वाहनतळाचे स्वरूप प्राप्त झाले आहे.
तहसील कार्यालयांमध्ये वाढली गर्दी
नाशिक : जमीन तसेच परवाने आदी कामांसाठी तहसील कार्यालयामध्ये अभ्यागतांची गर्दी वाढू लागली आहे. त्याबरोबरच येथील तलाठी कार्यालयांमध्ये सातबारा, शेतसारा भरण्यासाठी देखील नाशिककरांची गर्दी होऊ लागली आहे. शासकीय कामकाजाला गती मिळत असल्याचे दैनंदिन गर्दीवरून दिसून येत आहे.
तपोवन रस्त्यावरील भाजीबाजार वाढला
नाशिक : तपोवन मार्गावरील नासर्डी पूल ते शंकरनगर चौक या मार्गावर भरणाऱ्या भाजीबाजारात वाढ झालेली आहे. या मार्गावर रस्त्याच्या एका बाजूला काही विक्रेते भाजी विक्रीचा व्यवसाय करीत होते. कोरोनाच्या काळात यात वाढ होत गेली. आता येथील बाजार दिवसेंदिवस वाढतच आहे. रस्त्याच्या दोन्ही बाजूला फळभाज्यांची दुकाने थाटली आहेत.
पेट्रोल दरवाढीने वाढले रिक्षाभाडे
नाशिक : पेट्रोलची दरवाढ झाल्यामुळे रिक्षाचालकांनीदेखील प्रवासी भाड्यात वाढ केली असल्याचे दिसते. शहर बसेसची अपुरी संख्या असल्याने प्रवाशांना स्वत:ची वाहने किंवा खासगी प्रवासी साधनांचा वापर करावा लागतो. पेट्रोलची दरवाढ झाल्यामुळे रिक्षाचालकांनी देखील आपल्या प्रवासी दरात वाढ केल्याचा अनुभव प्रवाशांना येत आहे.
पालेभाज्यांचे दर झाले कमी
नाशिक : अवकाळी पावसामुळे पालेभाज्यांचे वाढलेले दर काही प्रमाणात नियंत्रित झाल्याचे दिसते. मेथी, शेपू या भाज्यांची जुडी दहा रुपयांचा मिळू लागली असल्याने गृहिणींनी समाधान व्यक्त केले आहे. अन्य भाजीपालादेखील स्वस्त झाल्याने खरेदी देखील वाढली आहे. गाजर, मका, टोमॅटो यांचे दर देखील कमी झाल्याचे बाजारभावावरून दिसून येत आहे.