भंगार बाजार भुईसपाट

महापालिकेची कारवाई : प्रचंड पोलीस फौजफाटा, व्यावसायिकांना हादरा

नाशिक : महापालिकेने शहराच्या इतिहासात शनिवारी (दि.७) अनधिकृत बांधकामविरोधी सर्वांत मोठ्या कारवाईला सुरुवात केली. चुंचाळे शिवार व अंबड-लिंकरोडवर गेल्या २० वर्षांपासून अनधिकृतपणे वसलेल्या भंगार बाजारावर महापालिकेने प्रचंड पोलीस बंदोबस्तात बुलडोझर चालविला आणि ठरलेल्या नियोजनानुसार सहा विभागांपैकी दोन विभागांतील एकूण ९४ अनधिकृत बांधकाम भुईसपाट केले. व्यावसायिकांचा किरकोळ विरोध वगळता पहिल्या दिवशी मोहीम शांततेत पार पडली. बाजार वाचविण्यासाठी सारे प्रयत्न विफल ठरल्यानंतर महापालिकेने केलेल्या या कारवाईने भंगार बाजार व्यावसायिकांना हादरा बसला आहे. विस्तीर्ण भागात पसरलेल्या या भंगार बाजारविरोधी आणखी काही दिवस मोहीम सुरू राहणार आहे.
गेल्या वीस वर्षांपासून या ना त्या कारणाने अभय मिळत गेलेल्या अनधिकृत भंगार बाजारासाठी शनिवारचा दिवस काळा ठरला. उच्च न्यायालयाच्या निर्देशानुसार, महापालिका आयुक्त अभिषेक कृष्ण यांनी भंगार बाजार हटविण्याचा निर्धार बोलून दाखविला आणि त्यानुसार, गेल्या दोन महिन्यांपासून सुरू असलेल्या नियोजनानंतर प्रत्यक्ष बाजारावर शनिवारी हातोडा पडला. महापालिकेने १५ डिसेंबर २०१६ रोजी भंगार बाजार व्यावसायिकांना नोटिसा बजावल्यानंतर आयुक्तांनी कारवाईसाठी ७ जानेवारीचा मुहूर्त निश्चित केला होता. त्यानुसार, सकाळी ७ वाजेच्या सुमारास अंबड-लिंकरोडवर जेसीबी, पोकलॅनसह वाहनांचा प्रचंड ताफा, पोलिसांचा फौजफाटा व महापालिकेच्या सहा पथकांतील सुमारे २५० कर्मचारी येऊन पोहोचले आणि ९ वाजेपासून प्रत्यक्ष कारवाईला सुरुवात करण्यात आली. बजरंगनगरपासून ते दत्तमंदिर चौकापर्यंतच्या पहिल्या भागातील अनधिकृत शेड व पक्की बांधकामे हटविण्यात आली. त्यामुळे परिसरात मोठ्या प्रमाणावर चक्काचूर झालेले पत्रे व लोखंडाचा अक्षरश: खच पडला. काही व्यावसायिकांनी पथक येण्यापूर्वीच स्वत:हून जेवढा माल वाचविता येईल त्यासाठी प्रयत्न केले.