कर्मचाऱ्यांच्या कार्य सुविधेकरिता महत्त्वपूर्ण ठराव मंजूर

द्विवार्षिक अधिवेशन : आॅल इंडिया पोस्टल एम्प्लॉईज युनियन

 नाशिक : पोस्टमास्तरांची निवास व्यवस्था योग्य नसल्यास ती घरे नाकारून घरभाडे दिले जावे, महिला कर्मचाऱ्यांना (चाइल्ड केअर) च्या रजा नाकारल्या जाऊ नयेत, प्रत्येक मुख्यालयात चौकशी काउंटर स्वतंत्र्य सुरू करावीत, फेकनोटा डिटेक्टर व काउंटिंग यंत्रे सर्व आॅफिसेसमध्ये उपलब्ध करून द्यावीत, त्याचबरोबर एखाद्या कर्मचाऱ्यास जाणीवपूर्वक पुन्हा आदिवासी किंवा ग्रामीण भागात बदली देऊ नये आदि महत्त्वपूर्ण ठराव मंजूर करण्यात आले.
आॅल इंडिया पोस्टल एम्प्लॉईज युनियनच्या नाशिक विभागाचे द्विवार्षिक अधिवेशन हॉटेल पंचवटी येथे संपन्न झाले. यावेळी सदर ठराव एकमताने मंजूर करण्यात येऊन त्याची तातडीने अंमलबजावणी केली जावी यासंदर्भात पाठपुरावा करण्याचे ठरविण्यात आहे. प्रमुख अतिथी म्हणून सिटूचे राज्य अध्यक्ष डॉ. डी. एल. कराड, एआयपीइयूचे सर्कल सचिव सुरेंद्र पालव, सर्कल अध्यक्ष जगदीश पवार यांच्या उपस्थितीत अधिवेशन खेळीमेळीत पार पडले.
यावेळी डॉ. कराड यांनी कर्मचारी संघटनांनी यापुढे समाजाचे नेतृत्व करणे आवश्यक असल्याचे आपल्या मनोगतात सांगितले, तर नाशिक विभागातील सर्व कर्मचाऱ्यांच्या समस्या, अडी-अडचणी जाणून घेऊन त्या सोडविण्यासाठी सर्कलस्तरावर प्रयत्न केले जातील, असे आश्वासन पालव यांनी दिले. अधिवेशनातील सरकारी बंगला घेणे रद्द करणे, महिला कर्मचाऱ्यांचे विविध प्रश्न सोडविणे आदि विषयांवर चर्चा करण्यात आली. कार्यक्रमाचे प्रास्ताविक डी. एस. सोनवणे यांनी, तर सूत्रसंचालन अभिजित वानखेडे, बाळासाहेब कराड यांनी केले. त्यानंतर युनियनची पुढील दोन वर्षांकरिता नवीन कार्यकारिणीची निवड करण्यात आली. त्यामध्ये अध्यक्षपदी शैलेश कुलकर्णी, सेक्रेटरीपदी डी. एस. सोनवणे, खजिनदारपदी के. एन. चौधरी आदिंची निवड करण्यात आली.
अधिवेशन यशस्वीतेसाठी डी. के. लिलके, अमोल गवांदे, पराग एकांडे, किरण वर्पे, एच. के. बारी आदिंसह कर्मचाऱ्यांनी परिश्रम घेतले. (प्रतिनिधी)ै