"माझ्याकडे दैवी शक्ती आहे..." म्हणत लुटले १६ एकर रान; भोंदू अशोक खरातचा शेतकऱ्यांना गंडा, १४ वा गुन्हा दाखल

नाशिकचा भोंदू बाबा अशोक खरात याच्यावर सिन्नरमध्ये शेतकऱ्यांची जमीन हडपल्याप्रकरणी १४ वा गुन्हा दाखल.

भोंदूगिरी, जादूटोणा आणि महिलांच्या लैंगिक शोषणाने महाराष्ट्र हादरवून सोडणाऱ्या अशोक खरातचे कारनामे आता एकामागून एक समोर येत आहेत. सिन्नर तालुक्यातील मिरगाव येथे मंदिर उभारण्याच्या नावाखाली शेतकऱ्यांची फसवणूक करून त्यांची जमीन बळकावल्याप्रकरणी खरात आणि त्याची पत्नी कल्पना यांच्यावर सिन्नर पोलीस ठाण्यात १४ वा गुन्हा दाखल करण्यात आला आहे.

दैवी शक्तीची भीती आणि १६ एकर जमिनीचा मलिदा

समोर आलेल्या माहितीनुसार, २००३ ते २००४ दरम्यान अशोक खरातने मिरगाव येथील शेतकऱ्यांना आपल्या जाळ्यात ओढले होते. "तुमच्या शेतात मंदिर उभारायचे आहे, माझ्याकडे मोठी दैवी शक्ती आहे," अशी बतावणी त्याने केली. जर मंदिर उभारणीला विरोध केला, तर "तुमच्यावर जादूटोणा करून सर्वांचा नाश करेन," अशी धमकी त्याने जमीन मालकांना दिली होती. याच भीतीपोटी खरात आणि त्याच्या पत्नीने अवघ्या १५ लाखांत तब्बल १६.५० एकर जमीन खरेदी केली. यामध्ये ईशान्येश्वर मंदिर, फार्म हाऊस आणि आंब्याच्या बागेचा समावेश असून ही सर्व मालमत्ता खरातने स्वतःच्या नावावर करून शेतकऱ्यांची मोठी लूट केली.

गरोदर महिलेवर अत्याचार करणाऱ्या नराधमाचे फुटले बिंग

खरातचे पाप केवळ जमिनीच्या व्यवहारापुरते मर्यादित नाही. त्याच्या जवळच्या व्यक्तीच्या ७ महिन्यांच्या गरोदर पत्नीवर त्याने अत्याचार केल्याचा धक्कादायक प्रकार समोर आला होता. "प्रसूती सुरळीत होईल आणि मुलगाच होईल," असे सांगून त्याने या महिलेचे लैंगिक शोषण केले. या अत्याचाराच्या घटनेचा व्हिडिओ समोर आल्यानंतर खरातचे खरे स्वरूप जगासमोर आले आणि त्याच्यावर गुन्ह्यांचा डोंगर उभा राहिला.

१०० रुपयांचे चिंचोके विकले लाखांत!

खरात हा भक्तांना कसा मूर्ख बनवत होता, याचेही पुरावे समोर आले आहेत. १०० रुपये किलोने मिळणारे चिंचोके चमत्कारी असल्याचे सांगून तो भक्तांना लाखांत विकत असे. तसेच नकली साप आणि वाघाच्या कातड्याचा वापर करून भाविकांमध्ये भीती निर्माण करायचा.

आज पुन्हा न्यायालयात हजेरी

दुसऱ्या गुन्ह्यातील पोलीस कोठडी संपल्यानंतर, एसआयटीने आता तिसऱ्या गुन्ह्यात खरातचा ताबा घेतला आहे. एका महिलेच्या लैंगिक शोषण प्रकरणी त्याला आज पुन्हा न्यायालयात हजर केले जाणार आहे. खरातवर आतापर्यंत लैंगिक शोषणाचे ८ गुन्हे दाखल असून, एकूण गुन्ह्यांची संख्या १४ वर पोहोचली आहे. पोलीस आता त्याच्या 'ओकस प्रॉपर्टी' कार्यालयातील पुराव्यांच्या आधारे अधिक तपास करत आहेत.