दंड कारवाईत सवलत मिळवा

महापालिकेची योजना : वाणिज्य वापरकर्त्यांसाठी संधी

नाशिक : रहिवासी मिळकतींचा वाणिज्य-व्यावसायिक पातळीवर वापर करत महापालिकेचा कर बुडविणाऱ्या मिळकतधारकांसाठी मनपा प्रशासनाने सवलत योजना जाहीर केली असून, येत्या १० नोव्हेंबर २०१६ पर्यंत स्वत:हून आपली चूक कबूल करणाऱ्या मिळकतधारकांबाबत दंड व कारवाईविषयी सकारात्मक निर्णय घेतला जाणार आहे. मात्र, आगामी काळात होणाऱ्या मालमत्ता सर्वेक्षणात वापरातील बदल आढळून आल्यास संबंधितांवर कडक कारवाई केली जाणार असल्याचा इशारा आयुक्त अभिषेक कृष्ण यांनी दिला आहे.
महापालिकेच्या घरपट्टी विभागाने दोन महिन्यांपूर्वी पश्चिम विभागात नमुना सर्व्हे करत रहिवासी मिळकतींचा व्यावसायिक वापर करणाऱ्यांचा शोध घेतला असता त्यात ४८ मिळकतधारक आढळून आले होते. त्यानंतर सर्व विभागीय कार्यालयामार्फत राबविण्यात आलेल्या सर्वेक्षणात १३०९ मिळकतधारकांनी वापरात बदल करत मनपाची फसवणूक केल्याचे निदर्शनास आले होते. महापालिकेने संबंधितांना कारवाईबाबत नोटिसा बजावल्या आहेत. दरम्यान, वापरात बदल करत कर बुडवणाऱ्यांची संख्या याहून अधिक असल्याचा संशय मनपा प्रशासनाला आहे. त्यामुळे महापालिकेने दि. १० आॅक्टोबर ते १० नोव्हेंबर २०१६ कालावधीत ज्या मिळकतधारकांनी वापरातील बदल स्वत:हून कळवित आपली चूक मान्य केल्यास त्यांच्याविरुद्ध दंडात्मक कारवाई न करता सकारात्मक निर्णय घेण्याविषयी योजना आणली आहे.