नांदूरशिंगोटे : वयोवृद्ध दाम्पत्य विवाह समारंभ आटोपून घरी परतत असताना दुचाकीला खासगी बसची धडक झाल्याने पासष्ट वर्षीय महिला ठार झाल्याची घटना नाशिक-पुणे राष्ट्रीय महामार्गावरील नांदूरशिंगोटे शिवारात मंगळवारी ( दि.१०) दुपारी साडेतीन वाजेच्या सुमारास घडली. कौसाबाई संतू बोडके (६५) रा. वडझिरे, ता. सिन्नर असे मृत महिलेचे नाव आहे. याबाबत वावी पोलीस सूत्रांनी दिलेल्या माहितीनुसार नांदूरशिंगोटे येथे नातेवाइकांचा विवाह सोहळा आटोपून घरी परतत असताना सदरचा अपघात घडला आहे. वडझिरे येथील संतू बाबुराव बोडके (७०) व त्यांच्या पत्नी कौसाबाई बोडके हे वयोवृद्ध दाम्पत्य दुचाकी मोटारसायकल क्रमांक (एम.एच. १५, बी. एम. ३९७७) हिने नांदूरशिंगोटे येथे विवाह सोहळ्यासाठी आले होते. विवाह सोहळा आटोपल्यानंतर आपल्या दुचाकीने घरी जात असताना त्याच दरम्यान नांदूरशिंगोटे बाह्य वळण रस्त्यावर खासगी बस क्रमांक (एम.एच.१७, ए.जी. ६५६८) ही संगमनेरकडे जात असताना सदरचा अपघात घडला अपघात कौसाबाई ह्या गंभीर जखमी झाल्याने जागेवरच गतप्राण झाल्या. तर पती संतू हे जखमी झाले आहे. मंगल कार्यालयापासून अवघ्या शंभर ते दोनशे फूट अपघात झाल्याने हळहळ व्यक्त करण्यात येत आहे. शवविच्छेदन केल्यानंतर मृतदेह नातेवाइकांच्या ताब्यात देण्यात आला. रात्री उशिरा वडझिरे येथे अंत्यसंस्कार करण्यात आले. वावी पोलीस ठाण्यात मोटार अपघाताचा गुन्हा दाखल करण्यात आला असून पुढील तपास सहायक पोलीस उपनिरीक्षक आर. टी. तांदळकर करत आहेत.
नांदूरशिंगोटे अपघातात वयोवृद्ध महिला ठार
By लोकमत न्यूज नेटवर्क | Updated: May 11, 2022 01:17 IST